Hosteldegi órt: aıyptalýshylar sońǵy sózin aıtty
ALMATY. KAZINFORM – Almatyda hosteldegi órtke qatysty sot otyrysy ótti.
Búgin sotta aıyptalýshylar – ALA Hostel dırektory Ádilbek Muhamedıarov pen «Gıdservıs» kompanııasynyń ıesi Aleksandr Pekelnık sońǵy sózin aıtty. Ekeýi de QR Qylmystyq kodeksiniń 292-baby 3-bóligi boıynsha órt qaýipsizdigi talaptaryn buzyp, abaısyzda eki nemese odan da kóp adamnyń ólimine sebep bolǵany úshin aıyptalyp otyr.
Ádilbek Muhamedıarov sottan bas bostandyǵynan aıyrmaýdy surady. Ol óziniń 5 kámeletke tolmaǵan balasy men qart ata-anasy bar ekenin eske saldy.
– Jábirlenýshilerge materıaldyq kómek kórsetkenimdi eskerýdi suraımyn. Eger múmkindik bolsa, bostandyqta júrip, ári qaraı da kómektesip, qoǵamǵa paıda ákelgim keledi. Men úshin eń mańyzdysy — sottyń ádil sheshimi, - dedi ol.
Ekinshi aıyptalýshy – Aleksandr Pekelnık qaza bolǵandardyń otbasyna kóńil aıtty. Ol «KÝSA Halyq» kompanııasyna qyzmet kórsetken kezde keıbir qujattarda kemshilikter ketkenin moıyndady, alaıda onyń hostelge jáne qaıǵyly oqıǵaǵa qatysy joq ekenin atap ótti.
– Bul hostel ashylmaı turyp, áldeqaıda buryn jasalǵan qyzmet bolatyn. Bul nysannyń hostel retinde paıdalanylýy múmkin ekenin men bilgen joqpyn. Kórsetilgen qyzmetke «KÝSA Halyq» kompanııasy tolyqtaı qanaǵattanyp, qabyldaý aktisine qol qoıyp, barlyq somany tóledi. Qyzmet talapqa saı oryndaldy. Qujattarda belgili bir olqylyqtar bolǵanyn joqqa shyǵarmaımyn, biraq olardyń hostel men adamdardyń ólimine esh qatysy joq. Muny mamandar da, maǵan eshqandaı shaǵymy joq jábirlenýshi tarap ta rastady. Protseske qatysqandardyń bári meniń bul iske qatysym joq ekenin kórdi. Ádil sheshim shyǵady dep úmittenemin, - dedi Aleksandr Pekelnık.
Buǵan deıingi otyrysta prokýror Ádilbek Muhamedıarovty 5 jylǵa, al Aleksandr Pekelnıkti 4 jylǵa bas bostandyǵynan aıyrýdy suraǵan bolatyn.
Eske salaıyq, 2023 jyldyń 30 qarashasynda Ádı Sháripov, 86 mekenjaıy boıynsha «Almaty Hostel» hosteli órtendi.
Tótenshe jaǵdaı departamentine órt týraly habarlama 05:33-te túsken. Órt saldarynan hostelde 13 adam qaıtys boldy. Mert bolǵan 13 adamnyń tórteýi — sheteldikter (Reseı Federatsııasynyń 2 azamaty jáne Ózbekstannyń 2 azamaty), qalǵan toǵyzy — Qazaqstan Respýblıkasynyń azamattary.
Keıinirek órtengen hosteldiń ıeleri belgili boldy. Hostel ǵımaraty Halyk Bank-ke tıesili. Ony jalǵa alǵan — «ALA Hostel» JShS. Jaldaý týraly kelisimshart 2023 jyly 21 qyrkúıekte jasalǵan.
2023 jyldyń jeltoqsan aıynda hosteldiń basshysy ustaldy.