Hostelde turatyn kolledj stýdentteri qansha aqsha tóleıdi
ASTANA. QazAqparat - Astana qalasynyń ákimdigi jataqxanaǵa syımaǵan kolledj stýdentterin xostelderge ornalastyrady. Atalǵan bastama bıyl alǵash ret qolǵa alynyp otyr, dep xabarlaıdy QazAqparat tilshisi.
Bilim basqarmasynyń basshysy Ánýar Janǵozınniń aıtýynsha, barlyq quziretti organdar jańa bastamany pysyqtap shyqty. QR Bilim jáne ǵylym mınıstrligi de óz kelisimin berdi. Sodan kolledj stýdentterin qabyldaıtyn xostelderdi arnaıy konkýrs arqyly anyqtady.
"Biz xostelder arasynda konkýrs ótkizdik. Qazir sonyń qorytyndysyn jasap jatyrmyz. Jospar boıynsha tólemaqynyń bir bóligin ákimdiktiń esebinen tólense, qalǵanyn stýdetterdiń ózderi tóleıdi. Biraq olardyń aqysy jataqxanadan artyq bolmaıdy. Máselen, ákimdik árbir oryn úshin 22 000 teńge tóleıdi. Al stýdent óz qaltasynan 5 000 teńgedeı shyǵarady", - dedi Á.Janǵozın QazAqparat tilshisine bergen suxbatynda.
Aıta keteıik, sáýir aıynda QR Prezıdenti Nursultan Nazarbaevtyń tóraǵalyǵymen Astanany damytý keńesi ótken bolatyn. Sol jerde qala ákimi Áset Isekeshev jataqxanaǵa syımaı qalǵan kolledj stýdentterin xostelderge ornalastyrýdy usyndy. Sebebi búginde elordada jataqxana oryndary tapshy. "Bizde 35 kolledj bar. Ol jerde 26 000 stýdent oqıdy. 1 800 adam jataqxanada turady. Endi, taǵy 2 100 oryn qajet. Qalada 100-den astam juldyzsyz otelder men xostelder bar. Barlyǵy 9 000 jatyn orynǵa eseptelgen. Mine, dál osy sanattaǵy xostelderge kolledj stýdentterin ornalastyrýǵa bolady. Osynyń arqasynda ýaqytty da, aqshany da únemdeýge múmkindik bar", - dep atap kórsetti Á.Isekeshev.
