Hosnı Múbárak osy aptada túrmeden bosap shyǵýy múmkin
ASTANA. 19 tamyz. QazAqparat - Mysyrdyń burynǵy prezıdenti Hosnı Múbárak osy aptada túrmeden bosap shyǵýy múmkin. Bul týraly Reseıdiń «Jańalyqtar» agenttigi habarlady.
Onyń advokatynyń málimdeýinshe, Mysyrdyń eks-prezıdenti H.Múbárak ózine taǵylǵan jemqorlyq isine qatysty aıyptaýlar alynǵannan keıin osy apta ishinde túrmeden bosap shyǵýy yqtımal.
Esterińizge sala keteıik, 2011 jyly aqpan aıynda bılikten alastatylǵan Múbárak bastapqy kezde bostandyqta júrdi. Biraq kóp uzamaı ony ereýilshilerdi óltirý jáne jemqorlyq aıyptary boıynsha jaýapkershilikke tartty. Sot 2012 jyly jazda ótken bolatyn. Búkil eldiń nazary osy iske aýdy. Ólim jazasyna kesý kerek degen usynystarǵa qaramastan, sot oǵan ómir boıy bas bostandyǵynan aıyrý jazasyn qoldandy.
