Hosh ıis adamnyń janyn emdeıdi: aromaterapııanyń qupııasy

ASTANA. KAZINFORM — Hosh ıis arqyly adamdardyń ishki dúnıesine úńilýge bolady. Erekshe terapııanyń túri týraly «Búgin LIVE» jobasynyń kezekti sanyna qonaq bolǵan Zarına ıArotskaıa aıtyp berdi.

– Biz hosh ıis arqyly adamdarǵa test jasaımyz. Onda adamdardyń ishki dúnıesinde bolyp jatqan kóńil kúıin anyqtaımyz. Terapııaǵa kelgen adam 25-ten asa hosh ıis ıiskeıdi. Sol ıiskegen hosh ıisi unasa, oǵan «+» belgisin qaldyrady. Unatpasa «–» dep belgileıdi. Soǵan qarap biz adamdardyń qandaı kóńil kúıde otyrǵanyn tekserip beremiz, – deıdi ol.

Aromaterapevttiń aıtýynsha, ár adamnyń ózine tán hosh ıisi bolady. Tek bolmysyna saı keletin ıisti durys tańdaý mańyzdy.

– Biz test jasaý arqyly ár adamnyń óz hosh ıisin tańdap beremiz. Qalaı deısiz ǵoı?! Meniń praktıkamda bizge kelgen adamdardyń 80 paıyzy mansabyn dóńgeletkisi keledi. «Aqshamdy kóbeıtsem» deıdi. Bireýler qarym-qatynasty sheshkisi keledi. Al keıbireýler mahabbat sezimimen kómekke júginedi. Sol kelýshilerdiń ártúrli suranysyna baılanysty biz test júrgizemiz. Sosyn sol adamnyń kóńil kúıine baılanysty arnaıy hosh ıis daıyndap beremiz. Ol aromatty sebý arqyly adamnyń suranysy ıispen, murynmen túpsanaǵa jetedi. Ol túpsanada uıyqtap jatqan resýrstardy oıata bastaıdy. Resýrstar oıanǵan kezde adamda oı ózgeredi ǵoı jáne múmkindikter paıda bolady. Sol múmkindikter arqyly tabysqa jete bastaıdy, – deıdi maman.

Zarına ıArotskaıa aromaterapııanyń qalaı júrgiziletinin túsindirdi.

– Birinshiden, biz aromat arqyly erli-zaıyptylardyń nemese qyz ben jigittiń qarym-qatynasyn, olardyń jumystaǵy kóńil kúıin, kásibiniń tabys ákelip, ákelmeıtinin, tipti áıel adamnyń ózin-ózi qanshalyqty jaqsy kóretinin anyqtaı alamyz. Adamnyń ómirge degen kózqarasy, ishki peıili, qandaı ózgeris kezeńinde júrgeni — bári osy arqyly kórinip turady. Biz aromat kómegimen adamdardy tanyp qana qoımaı, shyn máninde kómektese alamyz. Kóp adam ózgergisi keledi, ómirin jaqsartqysy keledi. Biraq neden bastaryn bilmeıdi. Biz sol ózgeristi bastaýǵa ıtermeleıtin birinshi qadamdy usynamyz. Olardyń ómirinde qandaı kúızelis bolyp jatqanyn, qandaı ózgeriske muqtaj ekenin kórip, baǵyt-baǵdar beremiz. Shyn nıetpen kelgen adamdar bizden test ótip, artynan birden keri baılanys berip, nátıjelerin jazyp jatady, – deıdi aromaterapevt.

Túrli hosh ıisti átirlermen jumys isteıtin maman ekologııalyq taza ıissýdy durys tańdaý laıfhagin bólisti.

– Eger seýip júrgen átirlerińizdi teksergilerińiz kelse, úıde otyryp saraptama jasaýǵa bolady. Ol úshin arnaıy tehnıka bar. Aınaǵa ózińizdiń átirińizdi sebesiz. Keıin sol jerge ot tutatsańyzdar, tútin shyǵady. Eger sol jerden qara tútin shyqsa, demek ol átir ekologııalyq zııandy. Al eger tútini tússiz, aqshyl bolyp shyǵyp jatsa, onda zııany joq aromatty seýip júrsiz, – deıdi ol.

Esterińizge sala keteıik, buǵan deıin mýzyka-terapevti notalar balanyń qyzyǵýshylyǵyn oıatyp, oń áserin tıgizetinin aıtqan edi.