Horvatııalyq fýtbolshy barlyq aýyldastarynyń nesıesin jaýyp berdi
ASTANA. QazAqparat - Fýtboldan Horvatııa ulttyq quramasynyń múshesi Ante Rebıch basynda nesıesi bar aýyldastarynyń barlyq qaryzyn ótep berdi. Bul týraly vijesti.rtl.hr saıtyna silteme jasap Eurosport habarlaıdy.
Jartylaı qorǵaýshy Ante Rebıch týyp-ósken aýylda qazir 500-ge tarta adam turady.
«Rebıch Splıt mańyndaǵy eldi mekende týyp-ósti. 19 jasynda Italııanyń «Fıorentına» klýbyna ketken bolsa da, tamyr jaıǵan topyraǵyn umytpady. Kishigirim aýyldyń basynda nesıesi bar barlyq turǵyndarynyń qaryzyn tólep berdi», - dep jazady Vijesti basylymy.
Aıta keteıik, Rebıch Horvatııa sapynda Reseıde ótken 2018 jylǵy Álem chempıonatynyń 6 kezdesýine qatysyp, Argentına qaqpasyna bir gol soqty.
Keshe, 15 shildede Horvatııa quramasy Frantsııamen fınaldyq oıynda kezdesip, mýndıaldyń kúmis júldesin ıelendi.
