Horvatııalyq kompanııa alǵash ret Qazaqstannyń geologııalyq barlaý sektoryna ınvestıtsııa salady
ASTANA. KAZINFORM – Elordada ótip jatqan GECA 2026 halyqarlyq geologııalyq forýmynda Energetıka mınıstrligi, «QazMunaıGaz» jáne Horvatııanyń kómirsýtek máseleleri jónindegi agenttiginiń enshiles kompanııasy – GEOENERGIJA RAZVOJ d.o.o. arasynda Aqtóbe oblysyndaǵy Shyǵys ýchaskesinde kómirsýtekterdi barlaý men óndirý boıynsha kelisimshart jasaldy.
Qujatqa Energetıka vıtse-mınıstri Erlan Aqbarov, QMG Basqarma tóraǵasynyń birinshi orynbasary Qurmanǵazy Esqazıev jáne GEOENERGIıA dırektory Marııo Galıch qol qoıdy.
«Shyǵys» jobasy tepe-teń talaptarmen (50/50) iske asyrylady. Bul rette horvat tarapy geologııalyq barlaý kezeńin tolyq qarjylandyrady. Jumystardyń eń az kólemi 500 shaqyrym bolatyn 2D seısmıkalyq barlaý júrgizýdi jáne tereńdigi 3 500 metr izdeý uńǵymasyn burǵylaýdy qamtıdy. Qol qoıylǵan kelisimshart Qazaqstan men Horvatııa arasyndaǵy strategııalyq seriktestiktiń mártebesin bekitedi.
Aıta ketsek, horvatııalyq kompanııa alǵash ret Qazaqstannyń geologııalyq barlaý sektoryna ınvestıtsııa salady. Bul memleketaralyq ekonomıkalyq yntymaqtastyqtyń qarqyndy damyp kele jatqanyn kórsetedi.
Buǵan deıin geologııalyq barlaýǵa salynǵan ınvestıtsııa kólemi 433 mlrd teńgege jetkenin jazǵan edik.
