Horvatııadaǵy Korchýla aralynda Nur-Sultan qalasy qurmetine záıtún aǵashy otyrǵyzyldy
NUR-SULTAN. QazAqparat - Horvatııadaǵy Korchýla aralynda Halyqaralyq «Marko Polo» art-festıvali aıasynda Qazaqstannyń poezııa, mýzyka jáne kınoóner kúnderi tabysty ótti, dep habarlaıdy QR SІM baspasóz qyzmeti.
Іs-sharaǵa Horvatııa Mádenıet mınıstrliginiń jáne Korchýla qalasynyń merııasynyń basshylyǵy, Ázerbaıjan, Izraıl, Indonezııa, Iran, Qazaqstan, Koreıa, Túrkııa elshileri, Qytaı, Úndistan, Chernogorııa ókilderi, sondaı-aq álemniń túrli elderinen kelgen qonaqtar men týrıster qatysty.
Festıvaldiń ashylýy Korchýla qalasyndaǵy Beıbitshilik Baqshasynda aǵash otyrǵyzýdyń sımvolıkalyq aktsııasymen atalyp ótti. Qazaqstannyń elshisi Tólejan Barlybaev Qazaqstan elordasynyń qurmetine «Nur-Sultan» záıtún aǵashtyń kóshetin otyrǵyzdy. Saltanatty rásim barysynda dıplomat Nur-Sultan qalasy Qazaqstannyń qazirgi zamandy, progresti jáne bolashaǵyn beıneleıtindigin atap ótti. Korchýla qalasynyń meri Andrııa Fabrıs Uly dalanyń kóshpeli halyqtarynyń tilin, dástúrleri men mádenıetin jaqsy biletin saıahatshy Marko Polonyń murasynyń sabaqtastyǵyn atap ótti.
«Álem Poezııasy» ádebı keshinde festıval qatysýshylary Horvat ónertanýshy, professor Sıbıla Petlevskıdiń poetıkalyq aýdarmasyndaǵy jáne kórkem oqýlaryndaǵy qazaq jazýshylarynyń shyǵarmashylyǵymen tanysty. Kesh barysynda Venalyq mýzyka ýnıversıtetinen arnaıy shaqyrylǵan qazaq klassıkalyq «Janym sol» dýetiniń oryndaýynda ásem áýen shyrqaldy. QR Tuńǵysh Prezıdenti - Elbasy Nursultan Nazarbaevtyń horvat tilinde alǵash ret shyǵarylǵan «Táýelsizdik dáýiri» kitabynyń tusaýkeseri úlken qyzyǵýshylyq týdyrdy.
Qazaqstannyń zamanaýı kınosy «Marko Polo» art-festıvalinde elimizdiń jetekshi rejısserleri Aqan Sataev pen Ermek Tursynovtyń kartınalarmen kórsetilgen bolatyn. Horvat tiline aýdarylǵan tanymal «Jaýjúrek Myń Bala» jáne «Kelin» kınofılmderi kórermenderdiń úlken qyzyǵýshylyǵyn týdyrdy.
