Horvatııada jarty tonnadan astam kokaın tárkilendi
NUR-SULTAN. QazAqparat – Horvatııa eliniń quqyq qorǵaý organdary ulttyq kedendik qyzmetpen qosylyp, Dýbrovnık qalasynan 90 shaqyrym jerdegi Ploche teńiz portynda Ońtústik Amerıkadan salmaǵy 575 kelige jýyq zańsyz kokaın partııasyn tárkileý boıynsha operatsııany sátti ótkizdi. Bul týraly QazAqparat HRT telearnasyna silteme jasap habarlaıdy.
Telearnanyń atap ótýinshe, esirtkini tárkileý operatsııasy 30 naýryzda ótkizilgen, alaıda Dýbrovnık polıtsııasy ol jaıly aqparatty tek 14 sáýir kúni jarııalady.
Dýbrovachko-Neretvan jýpanııasy (eldiń ákimshilik-aýmaqtyq birligi) krımınaldyq polıtsııa qyzmetiniń bastyǵy Zoran Tıkvıtsanyń aıtýynsha, 30 naýryzdaǵy arnaıy is-sharanyń barysynda jalpy quny 57 mln eýrony quraıtyn 574,869 keli esirtkilik zattar tárkilengen.
Horvatııa quqyq qorǵaýshylarynyń bul operatsııasy – sońǵy kezde ótkizilgen úshinshi is-shara.
