Horvatııada zańsyz mıgranttar jol apatyna ushyrady
NUR-SULTAN. QazAqparat – Horvatııada jol apatyna ushyraǵan júk kóliginde zańsyz mıgranttar bolǵany anyqtaldy, dep habarlaıdy QazAqparat Euronews-ke silteme jasap.
Horvatııada kólik apatynan tórt adam qaza tapty. Zagreb túbindegi kúre jolda Sırııadan mıgranttar tasymaldaǵan aýyr júk kólik aýdaryldy. Zańsyz mıgranttar salmaǵy bir tonna bolatyn qaǵaz býmalar tıelgen kóliktiń júk qorabynda otyrǵan.
Jaraqat alǵan 11 sırııalyq aýrýhanaǵa jetkizildi. Olardyń altaýynyń jaraqaty aýyr, taǵy biri ólim halinde.
Apat bolǵan aýdandaǵy kúre jolda kólik qozǵalysyn birneshe saǵatqa jabýǵa týra kelgen. Júk kóligi serbııalyq nómirge tirkelgen. Qazirgi kezde polıtsııa kóliktiń qaıda bara jatqanyn jáne qaıǵyly oqıǵaǵa ne sebep bolǵanyn anyqtap jatyr.
