Horgos arqyly ótetin transshekaralyq avtotýrızm qarqyn alyp keledi
ASTANA. KAZINFORM — Horgos baqylaý-ótkizý pýnkti arqyly ótetin transshekaralyq avtotýrızm Qytaı Halyq Respýblıkasynyń Ulttyq merekesi kezinde barǵan saıyn tanymal bola túsýde, dep habarlaıdy Sınhýa.
Qytaıdyń Ulttyq merekesi men dástúrli Chjýntsıý (Kúz ortasy nemese Aı merekesi) merekesine arnalǵan 1–8 qazan aralyǵyndaǵy demalys kúnderi Shyńjań-Uıǵyr avtonomııalyq aýdanyndaǵy (SÝAA, Qytaıdyń soltústik-batysy) Horgos BÓP arqyly kóptegen qytaılyq týrıst óz avtokólikterimen shetelge Ortalyq Azııa men Eýropa elderine saıahatqashyǵyp jatyr.
— Ulttyq mereke kezinde dosymmen birge Almaty men Sharyn shatqalyna barýdy josparlap otyrmyz. Odan keıin Astanaǵa baryp, serýendep, jergilikti taǵamdardan dám tatyp, tabıǵatty tamashalaǵymyz keledi, — dedi Tszıansý provıntsııasynan kelgen týrıst Van Mınchjen (Qytaıdyń shyǵysy).
Al Heılýntszıan provıntsııasynyń Harbın qalasynan kelgen Tszıan Veı úshin Horgos — Uly Jibek jolynyń boıymen ótetin, 20-dan astam eldi qamtıtyn avtosaıahatynyń bastaý núktesi.
— Biz Shandýn, Shensı jáne Hebeı provıntsııalarynan kelgen avtokólik áýesqoılarymen birge osy jerden Ortalyq Azııa men Eýropaǵa sapar shegemiz. 70 kúnnen keıin, jeltoqsanda Horgosqa qaıta oralamyz, — dedi ol.
Horgos BÓP shekara qyzmetiniń málimetinshe, bıylǵy jyldyń alǵashqy toǵyz aıynda avtokólik ótkeli arqyly 1,1 mıllıonnan astam týrıst ótken. Bul kórsetkish ótken jylmen salystyrǵanda 50%-ǵa joǵary. Transshekaralyq týrlar men jeke avtosaıahattarǵa degen suranys qarqyndy ósip keledi.
— Óz kóligimen sapar shegetin týrısterge kedendik rásimderdi tıimdi júrgizý úshin arnaıy dálizder ashyldy. Bul kólikterdiń tekserý aımaqtaryna rettelgen túrde kirýine múmkindik beredi jáne kólik tekserý ýaqytynyń qysqarýyna baǵyttalǵan sharalar atqarylyp jatyr, — dedi Horgos baqylaý-ótkizý pýnkti shekara qyzmetiniń ókili Chjý Chýnjý.
Sonymen qatar, Horgos halyqaralyq avtovokzalynda Qazaqstannyń negizgi qalalarymen baılanystyratyn birqatar halyqaralyq jolaýshylar baǵyttary ashyldy. Bul týrısterge saıahattaý nusqalaryn keńeıtti.
Aıta ketsek, «QazAvtoJol» ulttyq kompanııasy 12 qyrkúıekte Almaty — Kókpek — Kóktal — Horgos respýblıkalyq mańyzy bar avtojolynyń 291–306 shaqyrym aralyǵyndaǵy ýchaskesinde ortasha jóndeý jumystaryn aıaqtap, paıdalanýǵa bergenin habarlaǵan bolatyn.