Horeografııa salasynda mektepterge arnaıy baǵdarlama ázirlenedi
ASTANA. QazAqparat - Horeografııa salasynda Qazaqstannyń barlyq jalpyǵa bilim berý mektepteri úshin arnaıy baǵdarlamany ázirlenedi. Bul týraly «Qazaq ulttyq horeografııa akademııasy» KAQ men «Nazarbaev Zııatkerlik mektebi» Derbes bilim berý uıymynyń arasynda yntymaqtastyq týraly memorandým jasalý kezinde málim etildi.
Akademııa rektory - Altynaı Asylmuratova obektiniń biregeıligi, balalardy horeografııa ónerine oqytý úrdisi jóninde atap ótti. Óz kezeginde basqarma tóraıymy - Kúlásh Shámshıdınova eki oqý ornynyń úılesý sheńberin, sondaı-aq Nazarbaev Zııatkerlik mektepteriniń jobalary týraly aıtyp ótti.
Kelissózder barysynda ózara yntymaqtastyqtyń kelesi baǵyttary atap kórsetildi: «Nazarbaev Zııatkerlik mektebi» DBBU muǵalimderdi kásibı damytý, bilim berý mazmunyn jańartý salasyndaǵy tájirıbeni kórsetý, Akademııanyń basshylary men pedagogıkalyq qyzmetkerleriniń biliktiligin arttyrý; tájirıbe men bilim almastyrý, sondaı-aq kitaphana qoryn jańartý jáne kitaphanashylardyń ınnovatsııalyq jumysy salasyndaǵy yntymaqtastyq.
Qazaq ulttyq horeografııa akademııasynyń jalpy bilim berý pánderiniń oqytýshylary Pedagogıkalyq sheberlik ortalyǵy bazasynda biliktilikti arttyrý kýrstarynan ótedi. Nazarbaev Zııatkerlik mektebiniń horeograftary akademııada sheberlik klastaryna qatysady.
Budan basqa, taraptar horeografııa salasynda Qazaqstannyń barlyq jalpyǵa bilim berý mektepteri úshin arnaıy baǵdarlamany ázirleýdi sheshti. Sondaı-aq 2017 jylǵy 12 sáýirde Nazarbaev Zııatkerlik mektepterimen, «Jasulan»respýblıkalyq mektebimen jáne Qazaq ulttyq horeografııa akademııasymen «Kitap syılaý kúni» birlesken aktsııasyn ótkizýge sheshim qabyldady.
