Hokkeıden jastar arasyndaǵy ÁCh: Jartylaı fınalǵa kimder shyqty
NUR-SULTAN. QazAqparat - Chehııada ótip jatqan shaıbaly hokkeıden 20 jasqa deıingi jastar quramalary arasyndaǵy álem chempıonatynda jartylaı fınalǵa joldama alǵan komandalar belgili boldy, dep habarlaıdy QazAqparat tilshisi.
Jartylaı fınalda Reseı men Shvetsııa, Kanada men Fınlıandııa quramalary ózara sheberlik baıqasady. Bul oıyndar 4 qańtar kúni ótkiziledi. Al 4 qańtarda jartylaı fınal ótkizilse, 3 oryn ıegeri men chempıon 5 qańtarda anyqtalady. 2019 jyly Fınlıandııa quramasy altynnan alqa taqqan bolatyn.
Álem chempıonaty 1977 jyldan beri turaqty túrde uıymdastyrylyp keledi. Búgingi kúnge deıin 6 qurama chempıondyq ataqqa qol jetkizdi. Atap aıtqanda, Kanada - 17, Reseı (KSRO men TMD-ny qosa eseptegende) - 13, Fınlıandııa men AQSh - 4, Chehııa (Chehoslovakııany qosa eseptegende) - 3, Shvetsııa - 2 márte altyn medal aldy.
Qazaqstan jastar quramasy bıyl álem chempıonatynda A tobynda tórt kezdesý ótkizip, barlyǵynda qarsylastaryna ese jiberdi. Aldymen Shveıtsarııadan 3:5 esebimen jeńilgen qazaqstandyq hokkeıshiler odan keıin Slovakııadan 1:3, Fınlıandııadan 1:7 , Shvetsııadan 2:6 esebimen jol berdi. 2 qańtarda jubanysh kezeńindegi alǵashqy oıynynda Qazaqstan jastary Germanııadan 0:4 esebimen jeńildi.
Endi olar 4 qańtarda atalmysh qarsylasyn jeńýi tıis. Olaı bolmaǵan jaǵdaıda qazaqstandyq jastar joǵary dıvızıonnan túsip qalady.
