Hokkeıden qysqy Olımpıadaǵa irikteý kezeńi Qazaqstanda ótedi
NUR-SULTAN. QazAqparat - Halyqaralyq hokkeı federatsııasy (IIHF) 2022 jylǵy qysqy Olımpıadada shaıbaly hokkeıden irikteý kezeńiniń júıesin jarııalady, dep habarlaıdy QazAqparat tilshisi.
Qysqy Olımpıadada shaıbaly hokkeıden 12 qurama synǵa túsedi. IIHF reıtınginde joǵary kórsetkishtegi segiz qurama dúbirli dodaǵa tikeleı joldama alady. Olardyń qatarynda Kanada, Reseı, Shvetsııa, Fınlıandııa, Chehııa, AQSh, Germanııa men Shveıtsarııa quramalary bar. Al bir joldama Olımpıadany ótkizetin memleket retinde Qytaıǵa buıyrady. Aıta keterligi, qytaılyq hokkeıshiler atalmysh básekede tuńǵysh márte baq synaıdy. Taǵy úsh joldama irikteý kezeńinde jeńimpaz atanǵan quramalarǵa beriledi.
Bizdiń Qazaqstan hokkeıshileri jarysty úshinshi irikteý kezeńinen bastaıdy. Ol báseke elimizdiń astanasy - Nur-Sultan qalasynda ótkiziledi dep josparlanyp otyr. Іrikteý kezeńi 2020 jyldyń 6-9 aqpan kúnderi «Barys-arenada» bolady. Bizdiń hokkeıshilerdiń qarsylastary - Polsha, Ýkraına jáne ekinshi kezeńinen úzdik shyqqan bir qurama. Bul toptan bir qurama ǵana jarystyń kelesi satysyna shyǵady.
Іrikteý satysynyń fınaldyq kezeńi 7-30 tamyz kúnderi Slovakııa, Latvııa jáne Norvegııada bolady. Aıta keterligi, Olımpıadaǵa beriletin úsh joldamaǵa barlyǵy 46 qurama talasady.
Qazaqstan hokkeıshileri qysqy Olımpıada oıyndarynda eki márte baq synady. 1998 jyly 1/4 fınalǵa deıin jetse, 2006 jyly toǵyzynshy oryn aldy.
Qysqy Olımpıada oıyndary Qytaı astanasy - Beıjiń qalasynda ótkiziledi. Ol 2022 jyldyń 4-20 aqpan kúnderi bolady.
Budan buryn Qazaqstan shaıbaly hokkeıden álem chempıonaty top-dıvızıon oıyndaryn ótkizýi múmkin ekenin habarlaǵan edik.
