Hokkeıden Qazaqstannyń qurama komandasy Olımpıadaǵa óte almaı qaldy
ASTANA. 11 aqpan. QazAqparat - Hokkeıden Qazaqstannyń qurama komandasy 2014 jyly Sochıde ótetin qysqy Olımpıadaǵa qatyspaıtyn boldy.
7-10 aqpan aralyǵynda Rıgada ótken irikteý týrnıriniń qorytyndysy boıynsha bizdiń sportshylar ekinshi oryndy ǵana ıelendi. Birinshi orynǵa latvııalyq hokkeıshiler jaıǵasty, dep habarlady Vesti.kz . Úshinshi jáne tórtinshi oryndy Frantsııa men Ulybrıtanııa qurama komandalary ıelendi.
Vladımır Krıkýnovtyń shákirtteri frantsýzdarǵa qarsy ótken oıynda irikteý kezeńiniń birinshi matchynda jeńiske jetken bolatyn, al ekinshisinde Latvııanyń quramasynan jeńilis tapty. Úshinshi oıynda bizdiń sportshylar brıtandyqtardy oısyrata jeńdi.
Otandyq komandanyń taǵdyry sońǵy matchta sheshildi, latyshtar frantsýzdarǵa tótep berip, olardy jeńdi. Bul oıynda frantsýzdar jeńgende, Qazaqstan qurama komandasy olımpıadalyq joldamaǵa ıe bolar edi.
Osylaısha tórt jylda bir ret ótetin olımpıadaǵa joldamany Latvııanyń quramasy utyp aldy.
