Hokkeıden Qazaqstan jastar kýbogynyń fınalynda 143 mınýt aıyp belgilendi
NUR-SULTAN. QazAqparat – Jeksenbi kúni «Qaraǵandy Arena» muz aıdynynda hokkeıden 20 jasqa deıingi jastar arasyndaǵy alǵashqy Qazaqstan kýbogynyń fınaly boldy, dep habarlaıdy QazAqparat «SPORTINFORM» SAA-ǵa silteme jasap.
Kýboktyń alǵashqy ıegeri ataný úshin «Aqtóbe» men Kókshetaýdyń «Arlany» ymyrasyz kúres júrgizdi. Shyn máninde ymyrasyz.
Oıyn basynan aıaǵyna sheıin asa tartysty boldy, albyrt jastar berispeı saıysýdy qoıyp, keıde qarsylasqa aıaýsyzdyq ta tanytyp júrdi, endi birde tóbelesten de aıanyp qalǵan joq. Jalpy, kezdesýde oıynshylar 28 márte alańnan qýylyp, belgilengen aıyp ýaqyty 143 mınýtqa jetti.
Hokkeıdi muz ústindegi jekpe-jekke aınaldyrǵan eki hokkeıshimen qosa, «Arlannyń» bapkeri Vladımır Olenchenko da oıynnan qýyldy. Mamannyń sportqa tán emes áreketteri, tóreshilerdi balaǵattaýy, «Aqtóbe» oıynshylaryna qaraı bótelke laqtyrýy osyndaı qatań jazaǵa ákep soqtyrdy.
Oıynda «Aqtóbe» 6:3 esebimen jeńiske jetip, Qazaqstan «Jastar» Kýbogynyń tuńǵysh jeńimpazy atandy.
Aqtóbelik jastar buǵan deıin Qazaqstannyń Jastar lıgasyn da jeńip alǵan bolatyn.
