Hokkeıden Qazaqstan jasóspirimder quramasy joldastyq kezdesýde Vengrııany jeńdi

ASTANA. KAZINFORM — Shaıbaly hokkeıden Qazaqstan 18 jasqa deıingi jasóspirimder quramasy álem chempıonatyna daıyndyǵy aldynda Vengrııamen joldastyq kezdesý ótkizdi.

Kezdesý barysynda bizdiń qurama sapynan Aleksandr Sımahın 2, Leonıd Shakenov 9, Arıstarh Kıreev 21, Beksultan Maqysh 27, Álisher Sarkenov 40, Svıatoslav Evplov 49-mınýtta mergendigimen kózge tússe, oǵan vengrııalyq qurama bir shaıbamen jaýap berdi. 
Osylaısha qazaqstandyq qurama qarsylasynan 6:1 esebimen basym tústi.

Endi olar búgin, 17 sáýirde Avstrııamen joldastyq kezdesýde sheberlik baıqasady.
Qazaqstandyq hokkeıshiler birinshi dıvızıonynyń A tobynda synǵa túsedi. Qarsylastary — Danııa, Vengrııa, Slovenııa, Avstrııa jáne Ýkraına.

Aldymen 20 sáýirde Slovenııamen kezdesse, odan keıin 21 sáýirde Vengrııa, 23 sáýirde Danııa, 24 sáýirde Avstrııa, 26 sáýirde Ýkraınamen kezdesedi.

Eske salsaq, kókshetaýlyq «Arlan» komandasy shaıbaly hokkeıden 2025 jylǵy Qazaqstan chempıony atandy.