Hokkeıden Qazaqstan quramasy Vengrııany jeńdi
ASTANA. QazAqparat - Hokkeıden Qazaqstan ulttyq quramasy Býdapeshtte Vengrııa quramasymen joldastyq kezdesý ótkizip, 3:2 esebimen jeńiske jetti, dep habarlaıdy massaget.kz.
Andreı Nazarov jattyqtyratyn ulttyq qurama qazirgi tańda mamyr aıynda ótetin álem chempıonatyna tyńǵylyqty daıyndyǵyn júrgizýde.
Býdapesht muz aıdynyndaǵy oıynda esepti qazaqstandyq Evgenıı Rymarev ashty. Al 51 mınýtta Qazaqstan quramasy majarlyqtarǵa 2:1 esebimen ese jiberip jatty. Oıynnyń aıaqtalýyna sanaýly mınýttar qalǵanda Naıdjel Doýs tarazy basyn teńestirdi. Al jeńis shaıbasyn Brendon Bochenskıı soqty.
Qazaqstan quramasy 1 mamyr kúni Býdpeshtte ekinshi joldastyq kezdesýin ótkizedi. Otandastarymyzdyń qarsylasy - Reseı quramasy.
Aıta keteıik, álem chempıonaty 6-22 mamyr aralyǵynda Reseıdiń Máskeý jáne Sankt-Peterbýrg qalalarynda ótedi. Otandastarymyz «A» tobynda Reseı, Shvetsııa, Chehııa, Shveıtsarııa, Latvııa, Norvegııa jáne Danııa quramalarymen oınaıtyn bolady. Alǵashqy oıynyn 7 mamyr kúni Shveıtsarııa quramasyna qarsy ótkizedi. «A» tobyndaǵy quramalardyń oıyny Máskeýde ótedi.
