Hokkeıden Qazaqstan quramasy Álem chempıonatynda japondyqtardy jeńdi
ASTANA. 15 sáýir. QazAqparat - Hokkeıden Qazaqstan quramasy Býdapashte ótip jatqan Álem chempıonatynyń Birinshi dıvızıonynda oıyndy jeńisten bastady, dep habarlady Vesti.kz.
14 sáýir kúni ótken birinshi matchta Vladımır Krıkýnov jattyqtyratyn otandyq komanda Japonııadan aılasyn asyrdy.
Match bastalmaı turyp-aq mamandar Azıada fınalısteri Krıkýnovtyń komandasynan aıtarlyqtaı osal degen pikir bildirgen bolatyn. Degenmen, japondyqtar birinshi mınýtta Kolesnıkovtyń qaqpasyn shabýyldaı tústi. 13-inshi mınýtta japondyqtardyń kapıtany Go Tanatka esepti ashty.
Esepti Konstantın Sovenko oıynnyń 18-inshi mınýtynda teńestirdi - 1:1.
Teń esep matchtyń 26-ynshy mınýtyna deıin turyp, odan keıin Konstantın Romanov Andreı Korabeınıkovtyń kómegimen qazaqstandyqtardy alǵa shyǵardy. Biraq qarsylasyn kidirtip qalǵany úshin Vıtalıı Novopashın oıynnan shyǵarylǵannan keıin, japondyqtar eseptegi alshaqtyqty qaıta joıdy.
Jaǵdaıdy ekinshi kezeńniń sońǵy mınýtynda Konstantın Romanov túzedi, esep - 3:2.
Úshinshi jıyrmasynshy mınýtta qazaqstandyqtar taǵy eki shaıba soǵyp, senimdi jeńisterine qol jetkizdi - 5:2.
15 sáýir kúni Qazaqstan quramasy brıtandyq hokkeıshilerge qarsy oınaıtyn bolady. Match Astana ýaqytymen saǵat 20:00-de bastalady.
