Hokkeıden «Qazaqstan kýbogy» alǵash ret úsh qalada ótedi
NUR-SULTAN. QazAqparat – 27 qańtar men 2 aqpan aralyǵynda «PARIMATCH – Hokkeıden «Qazaqstan kýbogy» eldiń úsh qalasynda ótedi. Týrnır Qaraǵandy, Kókshetaý jáne Pavlodar qalalarynda bolady, dep habarlaıdy SPORTINFORM Qazaqstan hokkeı federatsııasynyń baspasóz qyzmetine silteme jasap.
Aldaǵy týrnır múldem basqasha bolmaq, sebebi bıylǵy maýsymda qatysýshylar quramy ǵana emes, sondaı-aq ony ótkizý formaty da ózgerdi.
• Qazaqstan Kýbogynyń alǵashqy oıyny 2001/02 maýsymnan bastaý aldy. Ol tarıhtaǵy eń uzaq Kýbok bolyp, 2001 jyldyń 24 qazanynan bastap, 2002 jyldyń 31 naýryzyna deıin sozyldy.
• Qazaqstan Kýbogynyń alǵashqy úsh oıyny «Qaztsınk-Torpedonyń» jeńisimen aıaqtaldy. Óskemendikter burynǵysha týrnırdiń rekordshylary bolyp otyr. Olardyń qorjynynda tórt jeńis bar (2002-2004, 2007).
• 2011 jyly Kýbok oıyndary tarıhynda matchtar alǵash ret eki elordalyq arenada – «Qazaqstan» muz saraıy men «Barys» sportkesheninde ótti.
• 2013 jyly oıyndar alǵash ret eki qalada – Kókshetaý men Temirtaýda ótti. Keıinirek bul dástúrge aınaldy.
• 2019 jylǵy Qazaqstan kýbogy 2013 jyldan beri alǵash ret bir ǵana qala – Almatyda ótti. Matchtardy «Halyk Arena» qabyldady. Kýbok matchtary alǵash ret QAZSPORT telearnasynyń tikeleı efırinde kórsetildi.
Qazaqstan Kýbogynyń sońǵy tórt maýsymynda eki ǵana komanda jeńip kelgenin aıta ketý kerek. Petropavldyq «Qulager» men óskemendik «Altaı Torpedo» eki retten jeńis tuǵyrynan kórindi.
