Hokkeıden Qazaqstan chempıonatynyń aty jáne logotıpi ózgerdi
NUR-SULTAN. QazAqparat – Elimizdiń bas hokkeı týrnıri 2020/2021 jylǵy maýsymnan bastap PRO HOKEI LIGASY – Qazaqstannyń kásipqoı hokkeı lıgasy dep atalady, dep habarlaıdy SPORTINFORM agenttigi Qazaqstan hokkeı federatsııasynyń (QHF) baspasóz qyzmetine silteme jasap.
Federatsııa Qazaqstannyń «Creeon» dızaın stýdııasymen birlesip sporttyq dızaındaǵy negizgi baǵyttardy beıneleıtin erekshe emblema jasap shyǵardy.
«Álemdik hokkeı trendine ilesip, biz de negizgi logotıp retin qalqandy aldyq. Ol qamqorlyq, birlik pen namys sımvoly. Ótkir burysh, qatty formalar oıynnyń mánin – kúsh pen energııany, senimdilikti, bıik maqsat men chempıondyqqa degen umtylysty kórsetedi», - delingen QHF Instagram paraqshasynda.
Aıta ketsek, buǵan deıin hokkeı federatsııasy da ataýy men uıymnyń logotıpin ózgertip rebrendıng jasaǵan bolatyn.
Qazaqstannyń Kásipqoı hokkeı lıgasy 12 qyrkúıekte bastalady dep josparlanǵan. Lıgaǵa Qazaqstan men Ózbekstannyń 10 komandasy qatysady. 2019/2020 jylǵy maýsym COVID-19 pandemııasyna baılanysty aıaqtalmaı qalǵan edi.
