Hokkeıden Qazaqstan chempıonaty: Jartylaı fınalda kimder oınaıdy

ASTANA. KAZINFORM - Shaıbaly hokkeıden Qazaqstan chempıonaty pleı-off satysy jartylaı fınalyna shyqqan barlyq komanda anyqtaldy.

Qaraǵandylyq «Saryarqa» sońǵy tórtinshi joldamaǵa qol jetkizdi. Olar Ózbekstannyń «Hýmo» klýbyn oıyndar serııasynda 4:2 esebimen qapy qaldyrdy.

Olardyń qarsylasy - Kókshetaýdyń «Arlany». Kókshetaýlyq komanda shırek fınalda oıyndar serııasynda 4:1 esebimen Atyraýdyń «Beıbarysyn» jeńip ketti.

Jartylaı fınaldaǵy taǵy bir jupta Astananyń «Nomady» men «Aqtóbe» kezdesedi. Oıyndar serııasynda «Nomad» Rýdnyıdyń «Gornıagyn», «Aqtóbe» Óskemenniń «Torpedosyn» 4:0 esebimen tize búktirdi.

Jartylaı fınal oıyndary 14 jáne 15 naýryz kúnderine belgilengen.

Eske salsaq, budan buryn 2026 jylǵy Qysqy Olımpıadada hokkeıden Qazaqstan quramasynyń irikteý satysyndaǵy qarsylastary anyqtaldy.

Qazaqstandyq hokkeıshiler D tobynda Slovakııa, Avstrııa jáne Vengrııamen 2026 jyly Italııada ótetin Qysqy Olımpıadaǵa beriletin joldamany sarapqa salady. Oıyndar 2024 jyldyń 29 tamyz jáne 1 qyrkúıegi aralyǵynda Slovakııa astanasy Bratıslava qalasynda ótkiziledi.