Hokkeıden Qazaqstan áıelder quramasy búgin Slovenııamen kezdesedi

ASTANA. KAZINFORM — Búgin shaıbaly hokkeıden Qazaqstan áıelder quramasy álem chempıonaty IIA dıvızıonynda besinshi oıynyn Slovenııaǵa qarsy ótkizedi.

Kezdesý Qazaqstan ýaqytymen 17:00–de bastalady.

Alǵashqy tórt týrdan keıin Italııa 12 upaımen kósh asyna shyqsa, Latvııa — 9, Ulybrıtanııa — 7, Ońtústik Koreıa — 5, Qazaqstan — 3 upaı enshilegen. Ázirge Slovenııanyń qorjyny bos.

Sondaı-aq búgin atalǵan topta Ońtústik Koreıa men Latvııa, Italııa men Ulybrıtanııa sheberlik baıqasady. IA dıvızıonyna jalǵyz joldama beriledi.  Qazaqstandyq hokkeıshiler álem chempıonaty IA dıvızıonynda 2005, 2007, 2009, 2024 jyldarda baq synaǵan edi.

El quramasy budan buryn Ońtústik Koreıany 4:2 esebimen tize búktirip, Italııa men Ulybrıtanııadan 0:2, Latvııadan 3:7 esebimen ese jiberdi.

Eske salsaq, shaıbaly hokkeıden Qazaqstan ulttyq quramasy Astana qalasynda 1-3 mamyr aralyǵynda halyqaralyq Qazaqstan Hockey Open týrnırine qatysady.