Hokkeıden el birinshiliginde «Torpedo» qatarynan segizinshi márte jeńiske jetti

ASTANA. KAZINFORM — Shaıbaly hokkeıden Qazaqstan chempıonatynda kezekti oıyn kúni máresine jetti.

Bul kúni óskemendik «Torpedo» óz aıdynynda rýdnyılyq «Gornıakty» 4:2 esebimen súrindirdi. Nátıjesinde olar qatarynan segizinshi márte jeńiske jetip, týrnır kestesindegi jaǵdaıyn odan ári jaqsarta tústi.

Taǵy bir kezdesýde qaraǵandylyq «Saryarqa» petropavldyq «Qulagerdi» 4:2 esebimen jeńse, astanalyq «Nomad» «Aqtóbeni» 4:2 esebimen tize búktirdi.

Endi 6 qazanda komandalar taǵy bir oıyn ótkizedi.

Aıta ketsek, budan buryn óskemendik «Torpedo» shaıbaly hokkeıden 2025 jylǵy Qazaqstan kýbogynyń ıegeri atandy.

Fınaldyq oıynda olar Qaraǵandynyń «Saryarqa» komandasynan 4:1 esebimen basym tústi. Nátıjesinde kýbokty tóbesine kóterdi.

Toptyq kezeńde komandalar Óskemen jáne Qaraǵandy qalalarynda sheberlik baıqasty. Toptyq kezeńnen keıin jartylaı fınal oıyndary jalǵasty. Onda topta birinshi oryn alǵan komandalar ekinshi toptaǵy ekinshi oryndaǵy ujymdarmen fınal joldamasyn sarapqa saldy.

Sheshýshi oıyndar Qaraǵandy qalasynda ótti.