Hokkeıden «Barys» komandasynyń bapkerler quramy belgili boldy
NUR-SULTAN. QazAqparat - Shaıbaly hokkeıden elordalyq «Barys» komandasynyń bapkerler quramy belgili boldy, dep habarlaıdy QazAqparat tilshisi.
Ótken maýsym aıynda komandanyń bas bapkeri qyzmetine belarýs mamany Andreı Skabelka taǵaıyndalǵan bolatyn.
Óz kezeginde A.Skabelka komandanyń bapkerler shtabynda qyzmet atqarýǵa kelesi mamandarǵa senim artyp otyr – Igor Matýshkın bas bapkerdiń kómekshisi bolsa, Fedor Polışýk shabýyl, Vladımır Kopat qorǵanys, Aleksandr Shımın qaqpa shebindegi oıynshylarǵa bapkerlik jasaıdy. Kırıll Legchakov fızıkalyq daıyndyqqa jaýap berse, Erlan Saǵymbaev oıynshylardy damytý baǵytynda qyzmet atqarady.
Eske salsaq, budan buryn shaıbaly hokkeıden Prezıdent kýbogynyń oıyn kestesi jarııalandy. Bıyl 12-shi márte jalaýyn kóteretin jarysqa qazaqstandyq «Barystan» ózge Reseıdiń «Neftehımık» (Nıjnekamsk), «Avtomobılıst» (Ekaterınbýrg), «Metallýrg» (Magnıtogorsk) jáne Qytaıdyń «Kýnlýn Red Star» komandalary qatysady.
Al qyrkúıek aıynda Qurlyqtyq hokkeı lıgasy bastalady.Qurlyqtyq hokkeı lıgasynyń turaqty chempıonaty 2023 jyldyń 26 aqpanyna deıin sozylady.
Gagarın kýbogy 1 naýryz jáne 29 sáýir aralyǵynda ótedi.
Foto: www.hcbarys.kz
