Hokkeıden álem chempıonatynyń nátıjelerin shaıan boljaıtyn bolady
ASTANA. 20 qarasha. QazAqparat - 2014 jyly Mınskide hokkeıden ótetin álem chempıonatynyń nátıjesin Petrovıch esimdi alyp shaıan boljaıtyn bolady.
Ol Mınsk «Ashyq teńiz» okeanografııasy ortalyǵyna sol úshin arnaıy ákelindi. Bul týraly Belarýstyń Sport jáne týrızm mınıstrliginiń baspasóz hatshysy Vladımır Nesterovıch habarlady.
Okeanografııa ortalyǵynyń dırektory Alekseı Azarov shaıannyń akvarıýmy hokkeı alańynyń úlgisinde jasalady dedi. Al onyń match nátıjelerin qalaı boljaıtyny ázirge qupııada saqtalyp otyr, dep habarlaıdy segodnya.ua.
Sporttyq matchtardyń nátıjelerin aldyn ala janýarlar arqyly boljaý 2010 jyly keń tanyldy. Aıtalyq, OAR-da fýtboldan ótken álem chempıonatynda Paýl segizaıaǵy fınalmen birge segiz matchtyń nátıjelerin dál boljap bergen bolatyn. Paýl óziniń boljamyn tamaq salynǵan eki konteınerdiń birin tańdaý arqyly jasady. Qaı elderdiń oıyny ótip jatsa, sol eldiń jalaýy konteınerlerde beınelenetin bolǵan.
Eske sala keteıik, hokkeıden álem chempıonaty 2014 jyly Mınskide 9-25 mamyr aralyǵynda ótedi.
