Hokkeıden Álem chempıonatynyń alǵashqy qatysýshysy Nur-Sultanǵa keldi
NUR-SULTAN. QazAqparat - 23 sáýir, seısenbi kúni Qazaqstan astanasyna Álem chempıonatyna qatysý úshin Ońtústik Koreıa hokkeı quramasy keldi, dep habarlaıdy QazAqparat «SPORTINFORM» SAA-ǵa silteme jasap.
Djım Pak shákirtteri álemdik dodada 1-dıvızıonnyń A tobynda óner kórsetedi. Olar 17:35-te áýejaıdan Radisson qonaqúıine jetti.
Avtobýstan alǵash túskenderdiń qatarynda eki dúrkin álem chempıony, Stenlı kýbogynyń jeńimpazy Sergeı Nemchınov boldy. Ol Koreıa quramasynyń bapkerler shtabyna qosylǵan.
«Jigitter alys sapardan sharshady, árıne. Biraq áli-aq kúsh jınap alady. Osy Álem chempıonatyna Koreıa quramasynyń barlyq myqty oıynshylaryn jınadyq», - deıdi Sergeı Nemchınov.
Eske sala keteıik, koreıalyqtar týrnır aldynda, ıaǵnı 26 sáýir kúni Qazaqstanmen joldastyq kezdesý ótkizedi. 29 sáýirde Álem chempıonatyn Vengrııaǵa qarsy oıynmen bastaıdy.
24 sáýir kúni Belarýs quramasynyń kelýi josparlanǵan.
