Hokkeıden álem chempıonatynda overtaım formaty ózgeredi
ASTANA. QazAqparat - Halyqaralyq shaıbaly hokkeı federatsııasy (IIHF) 2019 jyldan bastap álem chempıonattarynda overtaımdardyń formatyn ózgertpek, dep habarlaıdy QazAqparat federatsııanyń resmı saıtyna silteme jasap.
«Fınaldyń uzaq bolmaýyn talap etetin kóptegen sebepter bar. Komandalardyń barlyǵy da jańa oıyndarǵa daıyndalýy tıis. Budan basqa da biz qarastyrǵan qıyndyqtar jeterlik», - deıdi IIHF úılestirýshi komıtetiniń basshysy Frants Raındl.
Endi overtaımdar 3×3 formatynda ótkiziledi. Toptyq kezeńniń oıyndarynda overtaım bes mınýtqa sozylady, al pleı-off oıyndarynda - 10 mınýt, fınalda - 20 mınýt. Fınaldy qospaǵanda, barlyq kezdesýlerde býllıtter serııasy qarastyrylǵan.
Eske sala keteıik, 2019 jylǵy Álem chempıonaty Slovakııanyń Bratıslava jáne Koshıtse qalalarynda 10-26 mamyr aralyǵynda ótedi.
