Hokkeıden álem chempıonaty: Qazaqstannyń jasóspirim qyzdary ekinshi márte iri jeńiske jetti
ASTANA. QazAqparat - Shaıbaly hokkeıden 18 jasqa deıingi jasóspirim qyzdar arasyndaǵy álem chempıonatynda qazaqstandyqtar ekinshi jeńisine qol jetkizdi, dep habarlaıdy QazAqparat tilshisi.
El quramasy ekinshi dıvızıonynda V tobynda synǵa túsedi. Qarsylastary - Bolgarııa, Jańa Zelandııa, Belgııa, Estonııa, Islandııa.
Qazaqstandyq hokkeıshiler búgin, 28 qańtarda Jańa Zelandııamen sheberlik baıqasty. Bul kezdesý 26 qańtarda ótýi tıis bolatyn. Birqatar sebeppen ol keıinge shegerilgen edi.
Kezdesý barysynda qazaqstandyq hokkeıshiler basymdyq tanytty. Alǵashqy kezeńde el quramasynan Sofııa Rakovskaıa 12, Madıanna Núsipova 13-mınýttarda mergendik tanytty.
Ekinshi kezeńde qazaqstandyqtar sapynan Sofııa Zýbkova 23, 28-mınýttarda eki gol soqsa, úshinshi kezeńde 45, 49-mınýttarda taǵy eki márte qaqpany dál kózdedi. Oıynnyń 52-mınýtynda Madıanna Núsipova kezdesýdegi óziniń ekinshi shaıbasyn soqty. Jańa Zelandııa quramasy qazaqstandyq qaqpashyny bir márte qapy qaldyrdy.
Osylaısha qazaqstandyq hokkeıshiler 7:1 esebimen basym túsip, ekinshi jeńisine qol jetkizdi.
Endi el quramasy 29 qańtarda Belgııa, 31 qańtarda Estonııa, 2 aqpanda Islandııamen kezdesedi.
Eske salsaq, budan buryn qazaqstandyq hokkeıshiler Bolgarııany 8:1 esebimen jeńdi.
