Hokkeıden Álem chempıonaty: Qazaqstan quramasy Belarýsti jeńe ala ma
NUR-SULTAN. QazAqparat - Nur-Sultan qalasynda shaıbaly hokkeıden ótip jatqan Álem chempıonatynyń birinshi dıvızıonynyń A tobyndaǵy tórtinshi oıyn kúninde Qazaqstan quramasy Belarýspen kezdesedi, dep habarlaıdy QazAqparat tilshisi.
Qos qurama atalmysh dúbirli dodada ázirge jeńilistiń aşy dámin tatqan joq. Barlyq úsh kezdesýinde qarsylastaryn tize búktirdi. Qazaqstan hokkeıshileri aldymen Slovenııany 3:2 esebimen jeńse, odan keıin Lıtvadan 3:1 esebimen basym tústi. Úshinshi týrda Ońtústik Koreıany 4:1 esebimen jeńdi. Al Belarýs quramasy alǵashqy úsh týrda Lıtvany 4:3, Vengrııany 3:1, Slovenııany 4:1 esebimen utty. Osylaısha eki qurama alǵashqy úsh týrdan keıin birdeı upaı jınap, týrnır kestesinde birinshi jáne ekinshi oryndy ózara bólisip tur.
Qazaqstan men Belarýs hokkeıshileri buǵan deıin 11 márte kezdesti. Aıta keterligi, búgingi kúnge deıin bizdiń qurama atalmysh qarsylasyn tize búktire almaı keledi. Tek 1997 jyldyń 9 aqpanynda qysqy Olımpıada oıyndaryna irikteý kezeńinde eki qurama 4:4 esebimen teń tústi. Nátıjesinde atalmysh dúbirli dodanyń fınaldyq satysyna ekeýi de joldama aldy. Ekeýi qysqy Olımpıadanyń 1/8 fınaldyq satysyna deıin jetti. Sondyqtan búgin, 4 mamyr kúni Qazaqstan hokkeıshileri jeńiske jetken jaǵdaıda ol bizdiń qurama úshin tarıhı oıyn bolady.
Belarýs quramasy 1992 jyldan beri túrli deńgeıdegi týrnırlerde baq synap keledi. Alǵashqy kezdesýin sol jyldyń 7 qarashasynda óz eliniń astanasy - Mınsk qalasynda Ýkraınaǵa qarsy ótkizdi. Atalmysh kezdesýde ýkraındar 4:1 esebimen basym tústi. 1996 jyly 30 mamyrda Latvııa astanasy - Rıga qalasynda Lıtvany 21:1 iri esebimen jeńdi. Al 1997 jyly Fınlıandııadan, 1998 jyly Kanadadan 2:11 esebimen oısyraı jeńildi.
Aıta keterligi, 2005 jyldan beri Belarýs hokkeıshileri úzdikter synǵa túsetin A dıvızıonynda tájirıbe jınaqtady. 2006 jyly eń jaqsy nátıjesine qol jetkizdi. Sol jyly alǵashqy altylyqtan kórindi.
Qazirgi tańda Belarýs quramasynyń oıynshylary negizinen Qurlyqtyq hokkeı lıgasynda synǵa túsetin «Dınamo» (Mınsk), «Admıral», «Traktor», «Iokerıt» (Fınlıandııa) komandalarynyń namysyn qorǵaıdy. Sondaı-aq, AQSh-tyń «Oýen Saýnd Attak», Chehııanyń «Shkoda» klýbtarynda synǵa túsip júrgen hokkeıshiler bar. Qalǵany Belarýs ekstralıgasyndaǵy «ıÝnost», «Neman», «Shahter» (Solıgorsk) sekildi ujymdarda oınaıtyn sportshylar da quramaǵa shaqyrylǵan.
Qazaqstan quramasy men «Barys» komandasynyń bas bapkeri Andreı Skabelka 2012-2013 jyldarda Belarýs quramasyna basshylyq etti. Sondyqtan bas bapker óz eliniń hokkeıshileriniń osal tusyn tap basyp, bizdiń quramaǵa jeńis syılaı ala ma? Ony búgingi oıynda baǵamdaıtyn bolamyz.
Qazaqstan men Belarýs quramalary arasyndaǵy kezdesý Nur-Sultan ýaqytymen 17.30-da bastalady. Atalmysh oıyn QazSport telearnasynan tikeleı efırde kórsetiledi.
