Hokkeıden Álem chempıonaty: Qazaqstan quramasy A tobynda birinshi orynǵa shyqty
ASTANA. 16 sáýir. QazAqparat - Vladımır Krıkýnov jattyqtyratyn qazaqstandyq komanda hokkeıden Álem chempıonatynyń Birinshi dıvızıonyndaǵy A tobynda ekinshi jeńisine qol jetkizdi.
Jarystar Vengrııanyń Býdapesht qalasynda ótýde.
Vesti.kz-tiń habarlaýynsha, álem birinshiliginiń ekinshi matchynda qazaqstandyq hokkeıshiler Ulybrıtanııanyń quramasymen kezdesti. Matchtyń alǵashqy mınýttarynda kóshbasshyny anyqtaý qıynǵa soqty. Eki komanda da shabýyldaýǵa tyrysty, biraq qaqpashylar óz oryndarynan tabyldy. Birinshi kezeńniń sońynda Qazaqstan qorjynynda bir gol boldy. Konstantın Pýshkarevtiń kómegimen Konstantın Romanov Stıven Merfıdiń qaqpasynan sańylaý tapty. Al Ilıa Solarev Maksım Belıaevtiń pasymen kelesi shabýylda-aq qazaqstandyqtardyń basymdyǵyn eki eseledi.
Ekinshi jıyrma mınýtta eki komanda da qaqpany alýǵa jaqyn boldy. Ekinshi kezeńniń aıaqtalýyna bir mınýt qalǵanda Roman Savchenko Merfıdiń qaqpasyna taǵy bir gol jiberdi.
Úshinshi kezeńniń basynda qazaqstandyq hokkeıshiler taǵy bir shaıbany kirgizdi. Vadım Krasnoslobodtsev brıtandyq qaqpashyǵa múmkindik qaldyrmady. Al Evgenıı Blohın bolsa, besinshi shaıbanyń avtory atandy. Aıta keteıik, matchtyń úzdik oıynshysy bolyp Kolesnıkov tanyldy.
Osy jeńistiń arqasynda qazaqstandyq qurama shaıba sany boıynsha ıtalıandyq hokkeıshilerdi artta qaldyryp, A tobynda birinshi orynǵa shyqty.
Qazaqstan quramasy Álem chempıonatyndaǵy kelesi kezdesýdi 17 sáýir kúni muz alańynyń ıeleri - Vengrııa quramasymen ótkizedi.
Eske salaıyq, birinshi oıynda otandyq hokkeıshilerimiz Japonııa quramasyn jeńgen bolatyn.
Hokkeı. Álem chempıonaty. І Dıvızıon. A toby:
Qazaqstan - Ulybrıtanııa - 5:0 (2:0, 1:0, 2:0).
