Hokkeıden ÁCh: Jasóspirimder quramasy ekinshi márte jeńiske jetti
NUR-SULTAN. QazAqparat - Shaıbaly hokkeıden 18 jasqa deıingi Qazaqstan jasóspirimder quramasy álem chempıonaty birinshi dıvızıonynda ekinshi márte jeńiske jetti, dep habarlaıdy QazAqparat tilshisi.
Esterińizge sala ketelik, bizdiń qurama A tobynda synǵa túsip jatyr. Qarsylastary - Germanııa, Danııa, Frantsııa, Ýkraına jáne Norvegııa quramalary. Atalmysh báseke Frantsııanyń Grenobl qalasynda ótkizilip jatqany belgili.
Búgingi kezdesýde bizdiń qurama sapynan 12-mınýtta Artem Korolev, 32-mınýtta Álı Qasenov, 43-mınýtta Denıs Chaporov, 48-mınýtta Maksım Mýsorov qarsylastar qaqpasyn dál kózdedi. Al 50-mınýtta Danıl Býtenko, 58-mınýtta Álıhan Ómirbekov mergendik tanytty. Ýkraına sapynan 52-mınýtta Evgenı Abadjıan jalǵyz ǵana shaıbamen jaýap qaıyrdy.
Qazaqstan jasóspirimder quramasy buǵan deıin eki kezdesý ótkizip úlgerdi. Aldymen Germanııadan 2:5 esebimen jeńilip qaldy. Sosyn Frantsııany 7:2 esebimen tize búktirdi. Bizdiń qurama 18 sáýirde Norvegııamen sheberlik baıqasady. Kezdesý elordada ýaqytymen 20.00-de bastalady.
Búgin atalmysh topta taǵy eki kezdesý bolady. Atap aıtqanda, Germanııa men Danııa, Frantsııa men Norvegııa quramalary muz aıdynǵa shyǵady.
Foto: www.instagram.com/kazakhstanhockey
