Hokkeıden ÁCh: Qazaqstan jastary taǵy da jeńilip qaldy
ASTANA. QazAqparat - Hokkeıden 20 jasqa deıingi Qazaqstan jastary Kanadada ótip jatqan jastar arasyndaǵy álem chempıonatynda búgin AQSh quramasymen kezdesti, dep habarlaıdy QazAqparat tilshisi.
Qazaqstan quramasy V tobynda synǵa túsip jatyr. Bizdiń hokkeıshiler aldyna qoıylǵan mindet - bıylǵy dodada top-dıvızıondaǵy ornyn saqtap qalý. Bul bizdiń qurama úshin ońaı emes. Óıtkeni, toptaǵy árbir qarsylasymyz - burynnan osyndaı jarysta synǵa túsip júrgen tájirıbeli quramalar.
Solardyń biri - AQSh quramasy óz tarıhynda buǵan deıin tórt márte chempıon ataǵyna qol jetkizgen. 1977 jyldan beri ótkizilip kele jatqan atalmysh dodada olar alǵash ret 2004 jyly altynnan alqa taqty. Odan keıin 2010, 2013, 2017 jyldarda osyndaı tabysqa keneldi. Sondyqtan búgingi kezdesýde bizdiń quramaǵa ońaı tımeıtini anyq edi.
Birer mınýt buryn aıaqtalǵan atalmysh oıyn barysy biz kútkendegideı órbidi. AQSh quramasy negizinen shabýyl tizginin óz qolyna alsa, bizdiń hokkeıshiler qorǵanysqa kóbirek kóńil bóldi. Qarsylastar birinshi shaıbany 2-mınýtta soǵyp ketti. Ol Olıver Valstremniń enshisine jazyldy. Arada birer sekýnd ótkende bizdiń jastar qatarynan Andreı Býıalskıı tarazy basyn teńestirip, quramamyz álem chempıonatyndaǵy alǵashqy golyn soqty. Budan keıin búgingi qarsylasymyz oıyn tizginin tolyq óz qolyna alǵandaı boldy. AQSh hokkeıshisi Djoel Farabı 5, 8, 12-mınýttarda bizdiń qaqpadan úsh márte sańylaý tapty.
Qarsylastarymyz taǵy úsh shaıbany ekinshi kezeńde soqty. Aldymen Sasha Hmelevskı 25, Raıan Pılıng 30, Taıler Medden 32-mınýtta mergendik tanytty. Al Djosh Norrıs 40-mınýtta esepti ústemeleı tústi. AQSh quramasy osylaısha esepti 8:1-ge jetkizdi. Budan keıin bizdiń jastardan Dmıtrıı Mıtenkov AQSh qaqpashysyn qapy qaldyrdy.
Qazaqstan 28 jeltoqsanda Fınlıandııadan 0:5 esebimen jeńilip qalǵan edi. AQSh quramasy buǵan deıin 27 jeltoqsanda Slovakııany 2:1 esebimen tize búktirdi.
Qazaqstan jastary endi 31 jeltoqsanda saǵat 9.30-da Slovakııamen kezdesedi. Atalmysh kezdesý Qazsport telearnasynan tikeleı efırde kórsetiledi. Al 1 qańtarda bizdiń qurama Shvetsııamen muz aıdynǵa shyǵady.
Foto: olympic.kz
