Hokkeıden ÁCh: Qazaqstan U18 quramasy býllıtten Slovenııany jeńdi
ASTANA. KAZINFORM — Shaıbaly hokkeıden Qazaqstan jasóspirimder quramasy IA dıvızıondaǵy besinshi oıynyn Slovenııaǵa qarsy ótkizdi.
Otandastarymyz elıtalyq dıvızıonǵa jalǵyz joldamany Shveıtsarııa, Majarstan, Ýkraına, Polsha, Slovenııa quramalarymen sarapqa salyp jatyr.
Kezdesý barysynda qazaqstandyq hokkeıshiler ekinshi kezeńde óz qaqpasyna qatarynan eki shaıba ótkizip aldy. Esesine úshinshi kezeńde eki gol soǵyp, tarazy basyn teńestirdi.
Negizgi kezeńde 2:2 esebimen teń oınaǵan qarsylastar overtaımda da jeńimpazdy anyqtaı alǵan joq. Býllıtte Qazaqstan quramasynyń joly boldy. Osylaısha olar qarsylasynan 3:2 esebimen basym tústi.
Qazirge deıin quramalar úsh márte kezdesken edi. Ekeýinde qazaqstandyq hokkeıshiler jeńiske jetse, bireýinde qarsylasyna ese jiberdi.
Aıta ketsek, budan buryn qazaqstandyq hokkeıshiler Majarstan quramasynan 5:2, Polshadan 10:2, Ýkraınadan 5:3 esebimen basym tússe, Shveıtsarııaǵa 2:3 esebimen ese jiberdi.
Endi bul topta búgin Shveıtsarııa men Ýkraına, Majarstan men Polsha quramalary oınaıdy.
