Hokkeıden ÁCh: Qazaqstan quramasy taǵy utylyp qaldy
ASTANA. QazAqparat - Birinshi dıvızıon arasynda Býdapeshte ótip jatqan álem chempıonatynda Qazaqstan quramasy tórtinshi kezdesýin Slovenııa komandasymen ótkizdi, dep habarlaıdy QazAqparat tilshisi.
Birinshilikti qarqyndy bastaǵanymen, osynyń aldynda Italııa quramasynan oısyraı jeńilgen Ǵalym Mámbetálıevtiń shákirtteri jaǵdaıyn qıyndatyp alǵan bolatyn. Italııa, Qazaqstanǵa qosa Ulybrıtanııa men Vengrııa quramalary alty upaıdan ıelenip, elıtalyq dıvızıonǵa beriler qos joldama úshin talas qyza túsken-di.
Týrnır barysynda nebári úsh upaıdy ıelengen Slovenııa quramasyna sheginer jer joq edi. Sondyqtan olar qazaqstandyqtarmen oıynda baryn saldy. Birinshi kezeńde slovenııalyq Mıha Verlıch aldymen esep ashsa, sodan keıin qazaqstandyqtardan Egor Petýhov tarazy basyn teńestirip, Dmıtrıı Grents alǵa shyǵardy. Alaıda kóp uzamaı slovenııalyqtardan ıAn Ýrbas esepti teńestirdi.
Ekinshi kezeńde E.Petýhovtyń tártip buzýy muń eken, M.Verlıch ekinshi golyn soqty. 38-mınýtta taǵy bir san basymdylyǵyn paıdalanǵan slovenııalyq Sabahýdın Kovachevıch esepti 4:2-ge jetkizdi. Degenmen bir mınýt óter-ótpeste Álıhan Ásetov esepti qysqartty. Matchtan keıin Qazaqstan quramasynan osy Á.Ásetov úzdik oıynshy atandy.
Sheshýshi, úshinshi kezeńde qazaqstandyqtar óz múmkindigin paıdalana almasa, qaqpashy Henrık Karllsonmen jekedara shyqqan M.Verlıch het-trıktiń avtory atandy.
Osylaısha 5:3 esebimen jeńiske jetken slovenııalyqtar da 6 upaı jınap, qazaqstandyqtardy basyp ozdy. Osydan keıin Italııa quramasy ulybrıtanııalyqtardy jeńse, olar týrnır kestesinde jekedara kósh bastaıdy.
Eske sala keteıik, qazaqstandyqtar sońǵy kezdesýin erteń, 28 sáýirde Polsha quramasymen ótkizedi. Qos joldamanyń ıesi osy kúni aıaqtalady.
Foto: sports.kz
