Hokkeıden ÁCh: Qazaqstan quramasy Italııadan jeńilip qaldy
ASTANA. QazAqparat - Birinshi dıvızıon arasynda Býdapeshte ótip jatqan álem chempıonatynda qazaqstandyqtar kezekti kezdesýin Italııa quramasymen ótkizdi, dep habarlaıdy QazAqparat tilshisi.
Ǵalym Mámbetálıevtiń shákirtteri úshin ıtalııalyqtar osy týrnırdegi basty qarsylastarynyń biri bolatyn.
Matchty qarqyndy bastaǵan ıtalııalyqtar birinshi kezeńde 2:0 esebimen alǵa shyqty. Gol avtorlary - Peter Hokkofler men Dıego Kostner.
Ekinshi kezeńde Shon Makmonagl esepti 3:0-ge jetkizdi. Úshinshi kezeńde eshteńe ózgere qoıǵan joq.
Qazaqstandyqtar kezdesý barysynda san basymdylyǵyna ıe bolǵan sátterde de qaqpa kiltin taba almady.
Osylaısha 3:0 esebimen utyp ketken Italııa quramasy týrnır kestesinde qazaqstandyqtardy qýyp jetti. Endi olardyń enshisinde de alty upaı bar.
Eske sala keteıik, buǵan deıin Qazaqstan quramasynyń eki márte qatarynan iri jeńiske jetkenin jazǵan bolatynbyz. Endi elıtalyq dıvızıonǵa beriletin eki joldamanyń birine ıe bolý úshin qazaqstandyqtarǵa qalǵan eki kezdesýin jınaqy da jigerli ótkizý qajet-aq. Ǵ.Mámbetálıevtiń shákirtteri 27 sáýirde Slovenııamen, sońǵy, 28 sáýir kúni Polsha quramasymen oınaıdy.
