Hokkeıden ÁCh: Qazaqstan quramasy úshinshi jeńisine qol jetkizdi
ASTANA. KAZINFORM — Shaıbaly hokkeıden Qazaqstan quramasy birinshi dıvızıonnyń A tobynda búgin, 5 mamyrda úshinshi oıynyn Polshaǵa qarsy ótkizdi.
Kezdesý barysynda polshalyq hokkeıshiler jyldam gol soǵyp ketti. Odan keıin otandastarymyz tarazy basyn teńestirýge umtyldy. Soǵan qaramastan birinshi jáne ekinshi kezeńde olar qarsylas qaqpasynan sańylaý taba alǵan joq.
Úshinshi kezeńde qazaqstandyq hokkeıshiler polshalyq qaqpashyny úsh márte qapy qaldyrsa, óz qaqpasyna bir gol jiberip aldy.
Qazaqstan — Polsha (0:1, 0:0, 3:1)
0:1 — 01:09 — Vronka (Lyshcharchık, Narog)
1:1 — 48:01 — Mýratov (Mıhaılov, Shestakov)
2:1 — 57:53 — Sımonov (Logvın, Lıapýnov)
3:1 — 58:53 — Savıtskıı (Qaıyrjan, Shestakov)
3:2 — 59:58 — Krejolek (Valega, Vronka)
Qaqpashylar: Shýtov — Fýchık
Osylaısha Qazaqstan quramasy qarsylasyn 3:2 esebimen jeńip, týrnır kestesinde toǵyz upaımen kósh basynda tur.
Eki qurama qazirge deıin 12 márte kezdesip, on birinde otandastarymyz jeńiske jetken edi.
Aıta ketsek, budan buryn qazaqstandyq hokkeıshiler Lıtvadan 4:1, Japonııadan 6:0 esebimen basym tústi.
Endi qazaqstandyq hokkeıshiler endi 7 mamyrda 19:00–de Ýkraına, 8 mamyrda 15:30–da Frantsııa quramalarymen sheberlik baıqasady.
Atalǵan topta birinshi jáne ekinshi oryn alǵan quramalar 2027 jyly elıtalyq dıvızıonda baq synaýǵa múmkindik alsa, sońǵy oryndy mise tutqan qurama V tobyna túsip qalady.
Aıta ketsek, qazaqstandyq hokkeıshiler alǵashqy oqý-jattyǵý jıynyn 17 sáýirge deıin Astana qalasynda ótkizdi.
Odan keıin Belarýste 26 sáýirge deıin daıyndyq júrgizdi. Onda 25 sáýirde jergilikti «Dınamo-Molodechno» komandasynan 5:1 esebimen basym tústi.
Al 25 sáýirde joldastyq kezdesýde qazaqstandyq hokkeıshiler Slovenııa quramasyn 2:1 esebimen qapy qaldyrdy.
