Hokkeıden ÁCh: Qazaqstan quramasy búgin Polshamen oınaıdy
ASTANA. KAZINFORM - Shaıbaly hokkeıden Qazaqstan quramasy birinshi dıvızıonnyń A tobynda búgin, 5 mamyrda úshinshi oıynyn Polshaǵa qarsy ótkizedi.
Kezdesý Qazaqstan ýaqytymen 22:30-da bastalyp, «Qazsport» telearnasynan tikeleı efırde kórsetiledi.
Eki qurama qazirge deıin 12 márte kezdesip, on birinde otandastarymyz jeńiske jetti.
Aıta ketsek, budan buryn qazaqstandyq hokkeıshiler Lıtvadan 4:1, Japonııadan 6:0 esebimen basym tústi.
Al Polsha Frantsııaǵa býllıtten 2:3 esebimen ese jiberse, Ýkraınany 3:2 esebimen tize búktirdi.
Sondaı-aq qazaqstandyq hokkeıshiler endi 7 mamyrda 19:00-de Ýkraına, 8 mamyrda 15:30-da Frantsııa quramalarymen sheberlik baıqasady.
Eki týrdan keıin Qazaqstan 6 upaımen kósh basynda tursa, odan keıingi oryndardaǵy Frantsııanyń 5, Polshanyń 4, Ýkraınanyń 3 upaıy bar. Ázirge Lıtva men Japonııanyń qorjyny bos.
Atalǵan topta birinshi oryn alǵan qurama 2027 jyly elıtalyq dıvızıonda baq synaýǵa múmkindik alsa, sońǵy oryndy mise tutqan qurama V tobyna túsip qalady.
Aıta ketsek, qazaqstandyq hokkeıshiler alǵashqy oqý-jattyǵý jıynyn 17 sáýirge deıin Astana qalasynda ótkizdi.
Odan keıin Belarýste 26 sáýirge deıin daıyndyq júrgizdi. Onda 25 sáýirde jergilikti «Dınamo-Molodechno» komandasynan 5:1 esebimen basym tústi.
Al 25 sáýirde joldastyq kezdesýde qazaqstandyq hokkeıshiler Slovenııa quramasyn 2:1 esebimen qapy qaldyrdy.
