Hokkeıden ÁCh-2022: Qazaqstan quramasynyń qarsylastary anyqtaldy
NUR-SULTAN. QazAqparat - Shaıbaly hokkeıden 2022 jylǵy álem chempıonaty elıtalyq dıvızıonyndaǵy Qazaqstan quramasynyń qarsylastary anyqtaldy, dep habarlaıdy QazAqparat tilshisi.
Halyqaralyq shaıbaly hokkeı federatsııasynyń resmı saıty Fınlıandııanyń Helsınkı jáne Tampere qalalarynda ótetin álem chempıonatyna toptardy jarııalady.
Qazaqstan quramasy «A» tobynda Kanada, Reseı, Germanııa, Shveıtsarııa, Slovakııa, Danııa jáne Italııamen Helsınkı qalasyndaǵy muzaıdynda sheberlik baıqasady.
Al V tobynda Fınlıandııa, AQSh, Chehııa, Shvetsııa, Latvııa, Norvegııa, Belarýs jáne Ulybrıtanııa kúsh synasady.
Dúbirli doda 2022 jyly 13-29 mamyr aralyǵynda sol eldiń Helsınkı jáne Tampere qalalarynda ótkiziledi. Onda barlyǵy 16 qurama oınaıdy. Aldaǵy jyly da bıyl synǵa túsken quramalar qatysady.
Koronavırýs ınfektsııasyna baılanysty birinshi dıvızıondaǵy irikteý oıyndary ótkizilgen joq. Sondyqtan bıyl álem chempıonatynyń elıtalyq dıvızıonynda oınaǵan quramalar tolyqtaı ornyn saqtap qaldy.
Eske salsaq, 2021 jylǵy álem chempıonatynda Kanada quramasy chempıon atandy.
