Hokkeı: «jaı» «Barys» «Aq Barysty» jeńe almady
ASTANA. QazAqparat - Qurlyqtyq hokkeı lıgasynyń (QHL) kezekti oıynyn Astananyń «Barysy» Qazanda «Aq Barys» komandasymen ótkizip, 0:2 esebimen utylyp qaldy, dep habarlaıdy «QazAqparat» tilshisi.
Asa tartysty ótken matchta qarsylastar kópke deıin qaqpa kiltin taba almady. «Barys» sapynda bir ǵana Pavel Akolzın birneshe múmkindikti múlt jiberdi. Ásirese, ekinshi kezeńde «Aq Barystan» qos birdeı oıynshy aıdynnan qýylǵan sátte Evgenıı Koreshkovtyń shákirtteri úshin esep ashatyn tamasha sát týdy. Alaıda astanalyqtar muny paıdalana almady. Olar gol soǵyp úlgergenimen, tóreshiler qaqpashyǵa kedergi keltirdi degen sebeppen eseptemeı tastady. Budan keıin KSRO quramasy sapynda olımpıada, áldeneshe ret álem, Eýropa chempıony atanǵan belgili qorǵaýshy ári tanymal bapker Zınetýla Bılıaletdınov jattyqtyratyn qazandyqtar Henrık Karlsson qorǵaǵan qaqpaǵa lap qoıdy. Sóıtip ekinshi kezeń bitýge bir mınýtqa jetpeıtin ýaqyt qalǵanda, kanadalyq shabýlshy Rob Klınkhammer shaıbany ádemi baǵyttap, «Aq Barysty» alǵa shyǵardy.
Jalpy, match barysynda «Aq Barystyń» qaqpashysy Emıl Garıpovtyń sátti oınaǵanyn aıtýǵa bolady. Onyń ústine úshinshi kezeńde «Barys» sapyndaǵy kanadalyq qorǵaýshy Darren Dıts soqqan shaıba qaqpa jaqtaýyna tıip, keri qaıtty. Kezdesý sońyna taman aıdyn ıeleri qarqyndy qaıta kúsheıtti. Qarymta shabýylda H.Karlsson Dmıtrıı Obýhovtyń soqqysyn qaıtaryp úlgergenimen, Anton Glınkın shaıbaǵa birinshi bolyp jetip, esepti 2:0-ge jetkizdi. Kerisinshe astanalyqtardyń shabýylda azýsyzdyq kórsetkeni sondaı, bes márte san basymdylyǵyna ıe bolǵanymen, sonyń bireýinen de nátıje shyǵara almady.
Osylaısha, elordalyqtar birinshilikte tórtinshi ret qatarynan jeńilis tapty. Shyǵys konferentsııasynda ázirge tórtinshi satyda turǵan «Barys» kelesi oıynyn Sankt-Peterborda KHL-da 93 upaımen jekedara kósh bastap kele jatqan SKA komandasymen ótkizedi.
