Hokkeı: Jastar arasynda Fınlıandııa álem chempıony boldy

Fınlıandııa hokkeıshileri fınalda AQSh quramasyn 3:2 esebimen tize búktirdi. Osylaısha olar óz tarıhynda besinshi márte jeńimpaz atanyp otyr.

Hokkeıden 20 jasqa deıingi jastar arasynda álem chempıonaty 1977 jyldan beri turaqty túrde uıymdastyrylyp keledi. Búgingi kúnge deıin 6 qurama chempıondyq ataqqa qol jetkizdi.

Atap aıtqanda, Kanada 17, Reseı (KSRO men TMD-ny qosa eseptegende) 13, Fınlıandııa men AQSh 4, Chehııa (Chehoslovakııany qosa eseptegende) 3, Shvetsııa 2 márte altyn medal aldy. Bizdiń qurama top-dıvızıonda 1999 jyly alǵashqy altylyqqa endi. Bul - búgingi kúnge deıingi eń joǵary kórsetkishi. Al 1997 jyly bizdiń jigitter jetinshi orynǵa ıe boldy.

Al álem chempıonatynyń qola júldesi Reseı jastaryna buıyrdy. Olar 3-oryn úshin saıysta Shveıtsarııadan 5:2 esebimen basym tústi.

Esterińizge sala ketelik, atalmysh álem chempıonatyna Qazaqstan jastar quramasy da qatysty. Aldymen V tobynda synǵa túsken bizdiń jastar barlyq kezdesýinde qarsylastaryna ese jiberdi. Atap aıtqanda, aldymen Fınlıandııadan 0:5 esebimen jeńilse, odan keıin AQSh-tan 2:8 esebimen utylyp qaldy. Jastarymyz úshinshi kezdesýde Slovakııadan 2:11 esebimen oısyraı jeńilse, sońǵy oıynda Shvetsııaǵa 1:4 esebimen jol berdi.

Budan keıin bizdiń jastar jubanysh kezeńinde Danııa quramasymen synǵa tústi. Onda alǵashqy kezdesýde qarsylasynan 4:3 esebimen basym tússe, odan keıin 4:0 esebimen oısyrata jeńdi.

Endigi kezekte Danııa quramasy birinshi dıvızıonda baq synaıdy. Olardyń ornyna Germanııa quramasy shyqty.

Aldaǵy hokkeıden 20 jasqa deıingi jastar arasyndaǵy álem chempıonaty 2019 jyldyń 26 jeltoqsany men 2020 jyldyń 5 qańtar aralyǵynda Chehııanyń Ostrava, Trshınets qalalarynda ótkiziledi. Oǵan AQSh, Kanada, Reseı, Fınlıandııa, Shveıtsarııa, Shvetsııa, Chehııa, Slovakııa, Germanııa, Qazaqstan quramalary qatysady.

Foto: Krıs Berrı/RIA Novostı