Hokkeı: «Torpedo» tarazy basyn teńestirdi
ASTANA. QazAqparat - Búgin Joǵary xokkeı lıgasynyń jartylaı fınaldyq saıystary aıasynda Óskemen qalasynyń "Torpedo" komandasy óz alańynda "Rýbındi" tize búktirdi, dep xabarlaıdy QazAqparat tilshisi.
Bul oıynda qarsylastar esepti birinshi bolyp ashty. Alǵashqy kezeńniń úshinshi mınýtynda Andreı Korabeınıkov bir shaıbany soǵyp ketti. Degenmen, ekinshi kezeńde "Torpedonyń" xokkeıshisi Evgenıı Rymarev tarazy basyn teńestirip qana qoımaı, dýbl jasap, óz komandasyn alǵa shyǵardy. Al úshinshi kezeńde xet-trıktiń avtory atandy. Oıynnyń sońynda "Rýbınniń" bapkeri qaqpashyny alyp tastap, altynshy xokkeıshini shyǵardy. Sóıtip, tarazy basyn teńestirýge kúsh saldy. Alaıda torpedolyqtar bos turǵan qaqpaǵa tórtinshi shaıbany salyp ketti. Qorytyndy esep - 4:1.
Aıta keteıik, keshegi oıynda "Rýbın" xokkeı klýby 0:1 esebimen jeńiske jetken bolatyn. Búgingi matchtan keıin jalpy esep teńesti, 1:1. Fınalǵa shyǵý úshin qarsylasty tórt ret jeńý kerek.
