Hokkeı: «Torpedo - Dınamo» matchy jappaı tóbeleske ulasty
ASTANA. QazAqparat - Óskemen qalasynyń "Torpedo" xokkeı klýby óz alańynda eki ret qatarynan utylyp, fınaldyń eki upaıyn qarsylasyna berip qoıdy. Balashıxanyń "Dınamosy" taǵy eki ret jeńse, Joǵary xokkeı lıgasynyń jeńimpazy ári Bratına kýbogynyń ıegeri atanady, dep xabarlaıdy QazAqparat tilshisi.
Óskemen qalasynda ótken alǵashqy oıynda torpedolyqtar 1:2 esebimen utylǵan edi. Sol kezde qarsylastar eki birdeı shaıbany birinshi bolyp soǵyp ketken. Abyroı bolǵanda qarymta bir shaıba salyp úlgerdik. Al keshegi oıynnyń ekinshi kezeńinde "Dınamo" úsh shaıba soǵyp, birden 0:3 esebimen alǵa shyqty. Osy joly da "Torpedo" esepti tek bir shaıbaǵa qysqarta bildi. Oıynnyń sońynda xokkeıshilerdiń júıkesi syr berip, arty jappaı tóbeleske ulasty.
Degenmen, esep ózgermedi. Qorytyndy esep - 1:3. Osy oıynnan keıin "Dınamoda" eki upaı (0:2) bar. Al pleı-offtyń erejesine sáıkes, fınalda qarsylasty tórt ret jeńý kerek.
Aıta keteıik, bıylǵy chempıonatta "Torpedo" eń joǵary upaı sanyn jınap qana qoımaı, pleı-offtyń barlyq kezeńderinen súrinbeı ótti. Sóıtip, chempıonattyń tarıxynda alǵash ret fınalǵa shyǵyp otyr.
