Hokkeı: «Torpedo» alǵashqy matchta qarsylasyna jol berdi
ASTANA. QazAqparat - Joǵary xokkeı lıgasynda jartylaı fınaldyń alǵashqy matchtarynyń biri ótti.
Óskemen qalasynyń "Torpedo" xokkeı klýby óz alańynda "Rýbın" komandasyn (RF, Túmen oblysy) qabyldap, overtaımda qarsylasqa jol berip qoıdy, dep xabarlaıdy QazAqparat tilshisi.
Bul oıyndy "qaqpashylar teketiresi" dep ataýǵa bolady. Sebebi úsh kezeńnen turatyn 60 mınýttyq matchtyń ishinde xokkeıshiler birde-bir shaıba soǵa almady. Eki jaqta da jaqsy múmkindikter boldy. Alaıda, "Torpedonyń" qaqpashysy Sergeı Kýdrıavtsev te, "Rýbınniń" golkıperi Denıs Franskevıch te bir-birine des bermeı, qorǵanysqa tastúıin boldy. Sóıtip, overtaımǵa deıin jetti. Alaıda, qosymsha kezeńniń aıaq jaǵynda qarsylastar bir shaıbany soǵyp ketti. "Torpedonyń" qaqpashysy Kýdrıavtsev ony da ótkizbeıtin edi. Biraq qatty soǵylǵan shaıba aıaqtyń astyna túsip ketti. Osy qarbalasty paıdalanǵan qarsylastar shaıbany qaqpaǵa tyqqylap jiberdi. Qorytyndy esep - 0:1.
Osy oraıda aıta keter jáıt, "Rýbınniń" qaqpashysy Denıs Franskevıch - Qaraǵandy qalasynyń týmasy. 2012-2013 jyldary ol qaraǵandylyq "Saryarqa" komandasynyń sapynda óner kórsetip, fınalǵa deıin jetken bolatyn. Alaıda, Neftekamsk qalasynyń "Toros" xokkeı klýbyna utyldy. Osydan keıin Franskevıch bir jyl "Rýbınde", bir jyl "Ermakta" oınap, qaıtadan "Rýbınge" aýysyp bardy.
Keshegi oıynnan keıin "Rýbın" jalpy esepte bir upaımen alǵa shyqty. Lıga erejesine sáıkes, qarsylas komandany tórt ret jeńgen komanda kelesi aınalymǵa shyǵa alady. Endigi aınalym - fınal.
