Hokkeı: Sochı olımpıadasynyń joldamasyna talasta Qazaqstan Latvııadan utyldy
ASTANA. 9 aqpan. QazAqparat - Erlerimiz Sochı olımpıadasynyń joldamasyna talasyp jatyr. Biraq aıdyn ıelerimen ótken asa mańyzdy matchta jerlesterimiz jerge qarady,
dep habarlaıdy «Alaman».
Latvııa quramasyna 2:3 esebimen jol bergen Qazaqstan hokkeıshileriniń endi syǵyraıǵan úmitteri bar. Ol úshin latyshtar Frantsııadan iri eseppen utylýy kerek bolsa, bizdiń jigitter aǵylshyndardy tuqyrtýy tıis.
Ókinishke oraı, Qazaq eliniń qyzdary da Qytaıdan 1:2 esebimen utylyp, joldamadan túbegeıli úmitterin úzip otyr.
Aıdyn qojaıyndary tóreshiniń ysqyryǵy estilisimen bizdiń qaqpaǵa lap qoıdy. Alǵashqy mınýttardyń qarbalasqan sátterinde eki shaıbany birinen soń birin toǵytyp qazaqstandyqtardyń saǵyn syndyrǵandaı bolǵan... Qazaqstan bapkeri lezde qaqpashy Kolesnıkti Eremeevpen aýystyrdy. Óz kezeginde Eremeev birneshe qaýipti soqqylardy qaıtara aldy. Bizdiń jigitter esterin tez jıyp, eptep oıyn tizginin ózderine aýdarǵandaı da bolǵan. Birinshi kezeńniń sońyna taman esepti qysqartty. Ekinshi kezeńde latyshtardyń azshylyqta qalǵan sátin utymdy paıdalanyp esepti teńestirgen bizdiń jigitter úmitimizdi oıatty.
Úshinshi kezeńniń alǵashqy mınýttarynda Kevın Dallman óreskel qatelikke boı aldyryp, qarsylastyń shaıba soǵýyna múmkindik berip qoıdy. Óz kezeginde latysh Darzınsh múmkindikti qalt jibermeı mańyzdy shaıbany soqty. Oıyn bitýine birer mınýt qalǵanda qazaqstandyqtar táýekelge bel baılap qaqpashysyz alty oıynshymen oınaǵan. Tipti gol da soqqan edi, biraq beıneqaıtalaýdan anyqtap qaraǵannan soń «aıaqpen soqty» degendi jeleý etken tóreshiler bul shaıbany esepke almady.
