Hokkeı: «Slovanmen» oıynda Naıdjel Doýs het-trıktiń avtory atandy
ASTANA. QazAqparat - Qurlyqtyq hokkeı lıgasynda (QHL) óner kórsetetin Astananyń «Barysy» búgin óz aıdynynda Bratıslavanyń «Slovan» komandasyn qabyldap, 4:0 esebimen tize búktirdi, dep habarlaıdy «QazAqparat» tilshisi.
«Qazsport» telearnasynan tikeleı efırde kórsetkenindeı, «Slovan» Batys konferentsııasynda sońǵy oryndarda kele jatqan komandalardyń biri bolǵanymen, oıyn tizginin ońaılyqpen bermeıtindigin tanytty. Aldymen 3-mınýtta qonaqtardan Nık Ebert esep ashty. Іle-shala QHL-dyń qazan aıyndaǵy úzdik shabýylshysy bolyp tanylǵan «Barystyń» kapıtany Naıdjel Doýs bıylǵy birinshiliktegi 26-ynshy golyn soǵyp, tarazy basyn teńestirdi. Alaıda 10-mınýtta Andreı Shtıastny slovakııalyq klýbty qaıta alǵa shyǵardy. Budan keıin «Barystyń» alǵashqy bestiginen Lınden Veı men Darren Dıts tártip buzyp, aıdynnan qýylǵanymen, qonaqtar esepti ulǵaıta almady.
Ekinshi kezeńde N.Ebert aıdynnan qýylǵan kezde 27-mınýtta «Barystyń» úzdik oıynshylarynyń biri L.Veı mergendik tanytyp, esepti qaıta teńestirdi. Sálden soń Talǵat Jaılaýovtyń soqqan shaıbasyn tóreshiler beıneqaıtalaýdan keıin eseptemeı tastady. «Slovannyń» qos birdeı oıynshysy aıdynnan qýylǵan mezette aıqyn basymdylyqqa ıe bolǵan aıdyn ıeleri muny paıdalana almady. Degenmen 40-mınýtta qorǵaýshy Roman Starchenko qonaqtardyń qaqpasyna úshinshi goldy engizdi.
Matchtyń sońǵy bóliginde 43-mınýtta san basymdylyǵyn paıdalanǵan N.Doýs esepti 4:2-ge jetkizdi. Bir mınýt ótpeı jatyp Naıdjel Doýs óziniń osy chempıonattaǵy 28-inshi, matchtaǵy úshinshi golyn soqty.
Osylaısha, bul kezdesýden keıin 52 upaı jınaǵan Evgenıı Koreshkovtyń shákirtteri QHL-dyń jalpy kestesinde besinshi, Shyǵys konferentsııasynda kósh bastaǵan Qazannyń «Aq Barys» (56 upaı) komandasynan keıin ekinshi orynǵa kóterildi.
«Barys» kelesi oıynyn 3 qarasha kúni «Vıtıaz» (Máskeý oblysy) komandasymen ótkizedi. Búgin QHL-dyń azýly klýbtarynyń biri «Avangardty» (Omby) býllıt serııasynda utyp ketken «Vıtıaz» osal emes. Sondyqtan oǵan da tastúıin daıyndyqpen shyǵý qajet.
Aıta keteıik, QHL-dyń mergender kóshinde N.Doýs 28 golmen jekedara alda keledi. Ekinshi oryndaǵy TsSKA (Sankt-Peterbor) klýbynyń shabýylshysy Ilıa Kovalchýktyń enshisinde 20 shaıba bar. Gol men nátıjeli pasty eseptegende, N.Doýstyń esebinde 38 (28+10), «Barystyń» taǵy bir oıynshysy Lınden Veıde 37 (8+29), I.Kovalchýkta 36 upaı bar.
