Hokkeı: «Saryarqanyń» hokkeıshileri «oıandy»
ASTANA. 2 qazan. QazAqparat - Keshe Qaraǵandy qalasynyń «Saryarqa» hokkeı klýby óz alańynda «Rıazan» komandasyn oısyrata utty.
«Saryarqanyń» hokkeıshileri oıynnyń birinshi kezeńinde-aq qarsylastar qaqpasyna úsh birdeı shaıba salyp, alǵa shyqty. Al ekinshi kezeńde esepti 4:0-ge deıin jetkizdi. Úshinshi kezeńde de «Saryarqanyń» qarqyny basylmady. Qaraǵandylyq klýbtyń hokkeıshileri «Rıazannyń» qaqpashysyn taǵy eki márte san soqtyryp ketti. Oıyn barysynda qarsylastar tek bir shaıbamen ǵana jaýap bere aldy. Qorytyndy esep - 6:1. Osylaısha, buǵan deıin jeti márte utylǵan «Saryarqanyń» hokkeıshileri «oıanyp», jeńiske jetti. Komanda taǵy úsh upaıǵa ıe boldy. Qazir ol lıganyń jalpy týrnırlik kestesinde bir satyǵa kóterilip, 25-shi orynǵa ornalasty.
