Hokkeı: «Saryarqa» Qazaqstan kýbogynyń ıegeri atandy
NUR-SULTAN. QazAqparat - Qaraǵandynyń «Saryarqa» komandasy shaıbaly hokkeıden 2021 jylǵy Qazaqstan kýbogynyń ıegeri atandy, dep habarlaıdy QazAqparat tilshisi.
Qaraǵandylyq komanda fınalda overtaımda Óskemenniń «Torpedo» komandasyn 2:1 esebimen jeńdi. Qos klýb alǵashqy eki kezeńde bir-bir shaıbadan gol soqty. Úshinshi kezeńde de tablodaǵy esep ózgergen joq. Overtaımda qaraǵandylyq hokkeıshiler jeńis shaıbasyn soǵyp ketti.
Esterińizge sala ketelik, Qazaqstan kýbogy 27 jáne 2 aqpan aralyǵynda ótti. Komandalar aldymen úsh topqa bólinip, synǵa tústi. Árbir topta jeńimpaz atanǵan Kókshetaýdyń «Arlan» jáne «Torpedo», «Saryarqa» klýbtary jartylaı fınalǵa birden joldama aldy. Sondaı-aq, olardyń qataryna ekinshi oryn alǵan komandalar arasynda úzdik kórsetkishke qol jetkizgen «Almaty» klýby qosyldy.
Jartylaı fınalda «Torpedo» «Almatyny» 3:2, «Saryarqa» «Arlandy» 3:1 esebimen súrindirdi.
Sońǵy jyldarda Qazaqstan kýbogyna Óskemenniń «Altaı-Torpedo», Petropavldyń «Qulager» komandalary ıe boldy.
