Hokkeı: «Saryarqa» halyqaralyq týrnırde ekinshi oryn aldy
NUR-SULTAN. QazAqparat - Qazaqstandyq «Saryarqa» shaıbaly hokkeıden qurlyqtyq kýbogy fınaldyq satysyn ekinshi orynmen aıaqtady, dep habarlaıdy QazAqparat tilshisi.
Atalǵan týrnırdiń ekinshi oıynynda qazaqstandyq klýb Danııanyń «Olborg Paırets» komandasyn 4:1 esebimen súrindirdi.
Oıyn barysynda «Saryarqa» sapynan Sergeı Barbashev (4-mınýt), Stepan Grymzın (31-mınýt), Andreı ıAkovlev (35-mınýt) jáne Nıkıta Anohovskıı (60-mınýt) mergendik tanytty. Oǵan danııalyq klýbtan Ien Edmondson (45-mınýt) bir golmen jaýap qaıyrdy.
Eske salsaq, budan buryn «Saryarqa» birinshi oıynynda Polshanyń «Krakovııa» komandasyna 1:2 esebimen jol berdi.
Qurlyqtyq kýbok oıyndary 1998 jyldan beri turaqty túrde ótkizilip keledi.
2018/2019 jylǵy kezeńde qazaqstandyq «Arlan» (Kókshetaý) atalǵan týrnırde jeńimpaz atandy.
Al 2016/2017 jylǵy kezeńde «Beıbarys» (Atyraý), 2017/2018 jylǵy kezeńde «Nomad» (Nur-Sultan) kúmis júldege qol sozdy.
Sondaı-aq, 2007/2008 jylǵy kezeńde «Qaztsınk-Torpedo» (Óskemen) úzdik úshtikti túıindedi.
