Hokkeı: «Saryarqa» chempıonǵa jol berip qoıdy
ASTANA. 9 qyrkúıek. QazAqparat - Keshe Joǵary hokkeı lıgasynyń jańa maýsymy ótken chempıonattyń fınalyna shyqqan komandalar - «Saryarqa» men «Toros» arasyndaǵy oıynmen saltanatty túrde ashyldy.
Nıjnekamsk qalasynda ótken matchta «Saryrqanyń» hokkeıshileri oıynnyń sońǵy mınýttaryna deıin bir shaıbamen alda boldy. Birinshi kezeńde olar qarsylastardyń qaqpasyna eki birdeı shaıbany salyp ketti. Alaıda ekinshi kezeńde «Toros» tarazy basyn teńestire bildi. Úshinshi kezeńde «Saryarqa» taǵy bir shaıbamen alǵa shyqty. Biraq oıynnyń aıaqtalýyna úsh mınýt qalǵan kezde qarsylastar tarazy basyn taǵy da teńestirip ketti. Qosymsha ýaqytta da oıynnyń nátıjesi anyqtalmady. Al býllıt soqqylary kezinde «Saryarqanyń» hokkeıshileri «Torosqa» jol berip qoıdy. Qorytyndy esep - 3:4 (B). Osylaısha, «Toros» komandasy jalpy kestede eki upaımen kósh bastasa, qaraǵandylyq «Saryarqa» bir upaımen ekinshi orynda keledi.
