Hokkeı: reseılik klýbtar «Qaztsınk-Torpedony» jeńe almaı keledi
ASTANA. 21 qyrkúıek. QazAqparat - Joǵary hokkeı lıgasynyń jańa maýsymy aıasynda Óskemen qalasynyń «Qaztsınk-Torpedo» hokkeı klýby syrt alańda besinshi kezdesýin ótkizip, «Tıtan» komandasyn jeńdi.
Valerıı Harlamov atyndaǵy Klın qalasynyń muz aıdynynda ótken osy jolǵy oıynda da «Qaztsınk-Torpedo» hokkeıshileriniń basymdyǵy barynsha baıqaldy. Olar matchtyń úshinshi mınýtynda esep ashty. Al ekinshi kezeńde qarsylastardyń qaqpasyna eki birdeı shaıbany salyp ketti. Esep - 3:0. Biraq «Tıtan» komandasy tarazy basyn 3:2-ge deıin qysqarta bildi. Úshinshi kezeńde «Qaztsınk-Torpedo» esep aıyrmasyn eki shaıbaǵa jetkizdi. Qarsylastar taǵy da bir shaıbamen jaýap berdi. Esep - 4:3. Osydan keıin «Tıtan» óz shabýyldaryn údetip, esepti teńestirýge tyrysty. Alaıda «Qaztsınk-Torpedonyń» qorǵanysyn buza almady. Oıynnyń sońǵy eki mınýtynda qaqpashyny alyp tastap, altynshy hokkeıshini de shyǵaryp kórdi. Odan da eshteńe shyqqan joq. Al Óskemen qalasynyń hokkeı klýby osy múmkindikti qalt jibermeı, oıynnyń sońǵy besinshi shaıbasyn soqty. Qorytyndy esep - 5:3. Osylaısha, Joǵary hokkeı lıgasynyń jańa maýsymyn sátti bastaǵan «Qaztsınk-Torpedo» hokkeı komandasy bes oıynda da jeńiske jetip, jalpy týrnırlik kestede 14 upaımen kósh bastap tur.
